„Ég hef um langt ára­bil fært rök fyrir því að afnema eigi með öllu skerð­ingar vegna atvinnu­tekna í almanna­trygg­inga­kerf­inu, bæði fyrir öryrkja og eft­ir­launa­fólk. Þannig er það í Nor­egi og Sví­þjóð og Danir skerða mun minna en við vegna atvinnu­tekna.“

Þetta skrifar Stefán Ólafs­son, pró­­fessor emeritus við Háskóla Íslands og sér­­fræð­ingur hjá Efl­ing­u, í færslu á Face­book í dag.

Kjarn­inn greindi frá því í dag að Lilja Alfreðs­dóttir menn­ing­ar- og við­skipta­ráð­herra teldi að það ætti að minnka eða afnema skerð­ingar vegna atvinnu­tekna til þess að mæta skorti á starfs­fólki á íslenskum vinnu­mark­aði. „Ég veit að þetta er mjög rót­tækt,“ sagði ráð­herr­ann um til­lögu sína.

Þetta á að fram­kvæma strax og vera var­an­legt

Stefán segir að það sé gott hjá ráð­herr­anum að taka af skarið með þetta mál. „Það er hins vegar rangt hjá Lilju að þetta sé rót­tæk aðgerð og að hún ætti að vera tíma­bund­in,“ skrifar hann.

Hann segir jafn­framt að þessi aðgerð sé ekki rót­tækt því þessar skerð­ingar þjóni engum skyn­sam­legum til­gangi. „Þær eru ein­ungis til að gera lág­tekju-líf­eyr­is­þegum erf­ið­ara fyrir með að bjarga sér með atvinnu­þátt­töku. Þær eru stór hluti af þeirri fátækt­ar­gildru sem er í almanna­trygg­inga­kerf­inu.

Og skerð­ingar vegna atvinnu­tekna spara rik­inu ekki útgjöld sem neinu nem­ur. Raunar gæti aukin atvinnu­þátt­taka skilað rík­inu auknum skatt­tekjum umfram það sem tap­ast við afnám skerð­ing­anna. Þetta á því að fram­kvæma strax og vera var­an­leg­t,“ skrifar hann og bætir því við að einnig þurfi að draga úr skerð­ingum vegna líf­eyr­is­sjóðs­tekna.