Til­felli ebólu hefur greinst í Aust­ur-Afr­íku­rík­inu Úganda. 24 ára karl­maður úr þorpi Mubende-hér­aði, sem er í miðju lands­ins, lést og við rann­sókn kom í ljós að hann var smit­aður af ebólu­veirunni. Einnig eru sex óút­skýrð dauðs­föll fólks af sama svæði til rann­sóknar en grunur leikur á, að því er fram kemur í til­kynn­ingu Alþjóða heil­brigð­is­mála­stofn­un­ar­inn­ar, WHO, að fólkið hafi verið með ebólu. Til við­bótar eru átta mann­eskj­ur, sem ótt­ast er að séu með veiruna, inniliggj­andi á sjúkra­húsi.

Um er að ræða svo­kallað Súd­an-af­brigði ebólu­veirunnar og er þetta í fyrsta sinn í meira en ára­tug sem það grein­ist í Úganda að sögn Mats­hi­diso Moeti, fram­kvæmda­stjóra WHO í Afr­íku. Hún bendir á að þar sem Úganda hafi áður þurft að glíma við ebólu sé til þekk­ing til að fást við sjúk­dóm­inn og til að tak­marka útbreiðslu hans. Það hafi m.a. orðið til þess að um leið og grunur vakn­aði hafi verið gripið til aðgerða.

WHO veitir yfir­völdum í Úganda aðstoð og stuðn­ing vegna til­fell­is­ins sem nú hefur verið stað­fest og mögu­legs far­ald­urs. Meðal ann­ars hefur ýmiss bún­aður verið sendur til lands­ins.

Heil­brigð­is­kerfi Úganda er veik­byggt. Í land­inu búa á fimmta tug millj­óna manna og aðgengi að lækn­is­þjón­ustu er mjög tak­mark­að, sér­stak­lega í sveit­um.

Bólu­efni hefur verið þróað og reynt á ebólu. En aðeins gegn veiru­af­brigð­inu sem kennt er við Zaire. Það hefur enn ekki verið prófað gegn því afbrigði sem nú hefur upp­götvast í Úganda.

Ebóla er alvar­legur og oft lífs­hættu­legur sjúk­dómur sem leggst á menn og aðra prímata. Sex afbrigði af veirunni hafa verið greind og þrjú þeirra, meðal ann­ars þau sem kennd eru við Zaire og Súdan hafa leitt til far­aldra. WHO bendir á að erfitt sé að meta dán­ar­tíðni af völdum ebólu. Hún sé á bil­inu 41-100 pró­sent. Það hafi hins vegar sýnt sig að snemmtækt inn­grip í veik­indin geti skipt sköpum og dregið veru­lega úr hættu á dauða.