Stjórn Vátrygg­inga­fé­lag Íslands (VÍS) hefur ákveðið að lækka arð­greiðslu til hlut­hafa sinna úr fimm millj­örðum króna í 2.067 millj­ónir króna. Frá þessu er greint í til­kynn­ingu til Kaup­hallar rétt í þessu. Þetta er gert þrátt fyrir að stjórnin segi að arð­greiðslu­til­kynn­ingar hennar hafi verið vel innan þess ramman sem mark­mið um fjár­magns­skipan félags­ins gerir ráð fyr­ir.

Þar segir að við­skipta­vinir og starfs­menn VÍS skipti félagið miklu. „Stjórnin getur ekki horft fram hjá þeirri ­stað­reynd að fylgi hún núver­andi arð­greiðslu­stefnu, þá geti það skaðað orð­spor fyr­ir­tæk­is­ins. Í því ­ljósi hefur stjórn ákveðið að leggja til aðgreiðsla sé miðuð við hagnað síð­asta árs. ­Stjórn VÍS telur mik­il­vægt að fram fari umræða innan félags­ins, meðal hlut­hafa og út í sam­fé­lag­in­u um lang­tíma­stefnu varð­andi ráð­stöfun fjár­muna sem ekki nýt­ast rekstri skráðra félaga á mark­að­i."

Til­kynn­ing VÍS kemur í kjöl­far til­kynn­ingar Sjó­vár um að það trygg­inga­fé­lag hafi ákveðið að lækka arð­greiðslu sína úr 3,1 millj­arði króna í 657 millj­ónir króna. Hún er nú jafn há og hagn­aður Sjó­vár var á síð­asta ári. 

Tveir dagar eru síðan að stjórnir bæði VÍS og Sjó­vár sendu frá sér til­kynn­ingu þar sem þær sögðu að félögin myndu ekki breyta arð­greiðslu­á­formum sín­um.

Til­lögur stjórna þriggja stærstu trygg­inga­fé­laga lands­ins, VÍS, Trygg­ing­ar­mið­stöð (TM) og Sjó­vá, um að greiða eig­endum sínum sam­an­lagt 9,6 millj­arða króna í arð og kaupa af þeim hluta­bréf upp á 3,5 millj­arða króna, hefur væg­ast sagt mælst illa fyr­ir. Sér­stak­lega þar sem hagn­aður tveggja þeirra, VÍS og Sjó­vár, er mun lægri en fyr­ir­huguð arð­greiðsla. VÍS hagn­að­ist nefni­lega um 2,1 millj­arð króna í fyrra en ætlar að greiða hlut­höfum sínum út fimm millj­arða króna í arð. Sjóvá hagn­að­ist um 657 millj­ónir króna en ætlar að greiða út 3,1 millj­arð króna í arð. TM hagn­að­ist hins vegar um 2,5 millj­arða króna og ætlar að greiða hlut­höfum sínum út 1,5 millj­arð króna.