Aðalfundi VÍS, sem átti að fara fram í dag, hefur verið frestað. Eins og Við­skipta­blaðið greindi frá fyrr í dag drógu þeir Guð­mundur Þórð­ar­son og Jóhann Hall­dórs­son fram­boð sín til stjórnar félags­ins til baka rétt áður en aðal­fund­ur­inn hóf­st, eins og greint var frá á vef Við­skipta­blaðs­ins.

Gerði það að verkum að fjórar konur og einn karl voru í fram­boði til fimm manna stjórnar og því ómögu­legt að mynda stjórn sem upp­fyllti kröfur laga um kynja­kvóta, sem gerir ráð fyrir að minnsta kosti 40 pró­sent stjórnar séu af hvoru kyni.

Var því tekin ákvörðun um að fresta stjórn­ar­kjöri og situr núver­andi stjórn VÍS því áfram, að því er segir í frétt Við­skipta­blaðs­ins.

Í stjórn VÍS sitja nú Her­dís Dröfn Fjeld­sted, stjórn­ar­for­mað­ur, Jostein Sør­voll sem er vara­for­maður stjórn­ar, Guð­mundur Þórð­ar­son, Bjarni Brynj­ólfs­son og Helga Jóns­dótt­ir.

Enn í fram­boði til stjórnar voru þau Guðný Hans­dótt­ir, Helga Hlín Hákon­ar­dótt­ir, Helga Jóns­dótt­ir, Her­dís Dröfn Fjeld­sted, Jostein Sør­voll.

Stjórn VÍS ákvað 10. mars síð­ast­lið­inn að lækka til­lögu um arð­greiðslu til hlut­hafa sinna úr fimm millj­örðum króna í 2.067 millj­ónir króna. Frá þessu var greint í til­kynn­ingu til Kaup­hallar. Þetta var gert þrátt fyrir að stjórnin segði að arð­greiðslu­til­kynn­ingar hennar hafi verið vel innan þess ramman sem mark­mið um fjár­magns­skipan félags­ins gerir ráð fyr­ir.

Í til­kynn­ing­unni segir að við­skipta­vinir og starfs­menn VÍS skipti félagið miklu. „Stjórnin getur ekki horft fram hjá þeirri stað­reynd að fylgi hún núver­andi arð­greiðslu­stefnu, þá geti það skaðað orð­spor fyr­ir­tæk­is­ins. Í því ljósi hefur stjórn ákveðið að leggja til aðgreiðsla sé miðuð við hagnað síð­asta árs. Stjórn VÍS telur mik­il­vægt að fram fari umræða innan félags­ins, meðal hlut­hafa og út í sam­fé­lag­inu um lang­tíma­stefnu varð­andi ráð­stöfun fjár­muna sem ekki nýt­ast rekstri skráðra félaga á mark­að­i."

Ráð­gert er að aðal­fundur VÍS fari fram eftir þrjá til fjórar vik­ur.