Ragnar Þór Ingólfsson, formaður VR, telur frekari „hallarbyltingar“ innan verkalýðshreyfingarinnar vera framundan, og segir miklar breytingar hafa átt sér stað á stuttum tíma í mörgum stéttarfélögum. Þetta séu mikil tíðindi sem marki nýtt upphaf innan verkalýðshreyfingarinnar.
Þetta kemur fram í viðtali við Ragnar í Morgunblaðinu í dag. „Það er mikil undiralda. Hún hefur verið að byggjast upp. Þegar ég náði kjöri sem formaður VR fyrir ári kom mér á óvart hversu afgerandi niðurstaðan var. Mér varð þá ljóst að krafa var um ákveðnar breytingar innan hreyfingarinnar. Mitt framboð var mjög afdráttarlaust. Það var vantraustsyfirlýsing á ákveðna þætti og ákveðna aðila innan hreyfingarinnar,“ segir Ragnar Þór í viðtali við Morgunblaðið.
Eins og kunnugt er var Sólveig Anna Jónsdóttir kjörinn nýr formaður Eflingar á dögunum, en hún vann með yfirburðum. Hún naut stuðnings Ragnars Þórs í aðdraganda kosninga í Eflingu.
„Síðan má segja að grasrótin hafi stigið fram innan Kennarasambands Íslands (KHÍ). Það gerðist fyrst með kjöri Ragnars Þórs Péturssonar sem formanns KHÍ. Þá fór grasrótarmaður gegn ríkjandi öflum. Síðan gerðist það sama hjá Félagi grunnskólakennara þegar Þorgerður Laufey Diðriksdóttir er kjörin formaður. Bæði vinna yfirburðasigur. Nú síðast stígur Sólveig Anna Jónsdóttir fram í Eflingu með ekki ósvipuðum hætti og við gerðum í hallarbyltingunni árið 2009 í VR. Það var listakosning hjá Eflingu og niðurstaðan er ótrúleg,“ segir Ragnar Þór við Morgunblaðið.
