Opnun Costco í fyrra breytti ekki markaðsráðandi stöðu fyrirtækisins. Þetta kemur fram í nýrri frétt Samkeppnisyfirlitsins, en einnig er fjallað um málið í Fréttablaðinu í dag.
Kaup Haga á Olís og DGV
Samkeppnisyfirlitið hefur til skoðunar kaup Haga á Olíuverzlun Íslands hf. og fasteignafélagsins DGV, en fyrri rannsókn á samrunanum hófst í september í fyrra og lauk í byrjun mars fyrr á þessu ári. Á meðan rannsókn stóð yfir andmælti eftirlitið samrunanum og sagði hann ekki verða samþykktan án skilyrða.
Í byrjun mars senda Hagar þá frá sér tillögur til að uppfylla skilyrði Samkeppniseftirlitsins, en að mati stofnunarinnar komu tillögurnar of seint fram og hætt var við samrunann.
Þremur vikum seinna sendu Hagar nýja samrunatilkynningu og er í reglulegum samskiptum við Samkeppniseftirlitið í kjölfarið til að finna ásættanleg skilyrði sem þyrftu að liggja fyrir svo samruninn gæti átt sér stað. Síðastliðinn föstudag sendu Hagar svo lokatillögur sínar að skilyrðum, en þær fela í sér sölu á tveimur Bónusverslunum, einni fasteign félagsins þar sem rekin er Bónusverslun, tveggja bensínstöðva Olís auk einnar stöðvar ÓB. Í bréfi sem fylgdi tillögum Haga, segir fyrirtækið að gengið sé mjög langt í tillögunum og telja engin rök liggja fyrir um strangari aðgerðir til að gera samrunann mögulegan.
Á mánudaginn sendi svo Samkeppniseftirlitið frá sér bréf til hagsmunaaðila samrunans þar sem leitað var sjónarmiða þeirra á þessum tillögum. Í bréfinu kynnti eftirlitið einnig frummat sitt eftir rannsókn á áhrifum innkomu Costco, en samkvæmt frummatinu breytti opnun bandaríska smásölurisans ekki markaðsstöðu Haga í fyrra.
Sjónarmið hagsmunaaðilanna eiga að berast á næstu dögum og hafa þau áhrif á það hvort eftirlitið samþykki tillögurnar eða ekki. Fari svo að eftirlitið fallist ekki á þær verður samruninn ógildur.
