Hag­fræði­deild Lands­bank­ans spári því að lands­fram­leiðsla drag­ist saman á þessu ári um 0,4 pró­sent. Horft til næstu ára er gert ráð fyrir hóf­legum hag­vexti, 2 pró­sent á næsta ári og heldur meiri á árunum 2021 og 2022. 

Spá hag­fræði­deildar gerir ráð fyrir miklum sam­drætti í atvinnu­vega­fjár­fest­ingu, eða 21,2 pró­sent. Gangi það eft­ir, er það mestur sam­dráttur í atvinnu­vega­fjár­fest­ingu frá því árið 2009. 

Þetta kemur fram í nýrri hag­spá hag­fræði­deildar Lands­bank­ans. 

Hag­fræði­deildin telur að hag­vöxtur næstu ára verði studdur af lágum en sjálf­bærum vexti einka­neyslu, auknum opin­berum fjár­fest­ing­um, vax­andi útflutn­ingi og við­snún­ingi í atvinnu­vega­fjár­fest­ingu þegar fram í sæk­ir. 

Spáin gerir ráð fyrir umtals­verðum sam­drætti í inn­flutn­ingi á þessu ári, eða 6,4 pró­sent, en að síðan taki inn­flutn­ingur að aukast á næsta ári, með batn­andi tíð og auknum hag­vexti.

Hag­spáin end­ur­spegl­ar að óvissa er um þróun hag­vaxtar í heim­inum næstu miss­eri sem birt­ist nú þegar í hæg­ari vexti alþjóða­við­skipta og iðn­að­ar­fram­leiðslu. 

„Frek­ari stig­mögnun þeirrar þró­un­ar, umfram það sem nú er gert ráð fyr­ir, kann að hafa tölu­verð nei­kvæð áhrif hér á landi, m.a. á ferða­þjón­ust­una, sjáv­ar­út­veg og orku­frekan iðn­að. Að sama skapi myndi jákvæður við­snún­ingur í alþjóða­við­skiptum hafa jákvæð áhrif hér­lend­is, umfram það sem spáin gerir ráð fyr­ir. Í spánni er gert ráð fyrir að verð­bólga verði í stórum drátt­um í sam­ræmi við verð­bólgu­mark­mið Seðla­banka Íslands (2,5%) út spá­tíma­bil­ið, enda gert ráð fyrir að hag­vöxtur verði í takt við lang­tíma­fram­leiðslu­getu þjóð­ar­bús­ins,“ segir í til­kynn­ingu bank­ans.

Dan­íel Svav­ars­son, for­stöðu­maður hag­fræði­deildar Lands­bank­ans, segir að það hafi oft verið þannig í hag­sögu Íslands, að í lok hag­vaxt­ar­skeiðs fylgi erfitt aðlög­un­ar­tíma­bil. „Lokum hag­vaxt­ar­skeiða á Íslandi hefur oft fylgt erfitt aðlög­un­ar­tíma­bil vegna ójafn­vægis sem byggst hefur upp á góð­ær­is­ár­un­um. Því er þó ekki þannig farið í þetta skipt­ið. Þvert á móti er staða fyr­ir­tækja og heim­ila almennt nokkuð góð ef horft er til eigna og skuld­setn­ing­ar. Þá hefur kaup­máttur launa aldrei verið meiri, staða rík­is­sjóðs er mjög sterk og staða sveit­ar­fé­laga hefur almennt batn­að. Þá hefur Seðla­bank­inn byggt upp mjög mynd­ar­legan óskuld­settan gjald­eyr­is­vara­sjóð sem er mikil breyt­ing frá því sem áður var. Þar að auki styður afgangur á utan­rík­is­við­skiptum við gengi krón­unn­ar,“ segir Dan­í­el.