Alls voru 5.036 hryssur not­aðar í blóð­mera­hald árið 2019. Folöldum hryss­anna er alla jafna slátrað til kjöt­fram­leiðslu eða þau sett á til end­ur­nýj­un­ar. Sum þeirra eru nýtt til reið­hesta­rækt­un­ar.

Þetta kemur fram í svari Krist­jáns Þórs Júl­í­us­son­ar, sjáv­ar­út­vegs- og land­bún­að­ar­ráð­herra, við fyr­ir­spurn frá Ágústi Ólafi Ágústs­syni, þing­manni Sam­fylk­ing­ar­inn­ar, um blóð­mera­hald.

Hormón í blóði notað í frjó­sem­is­lyf

Blóð­bera­hald kall­ast það þegar fyl­fullar hryssur fram­leiða sér­stakt hormón í fylgj­unni á fyrri hluta með­göngu, eða á 40. til 120. degi. Horm­ónið hefur það hlut­verk að við­halda með­göngu með því að örva starf­semi eggja­stokka og fjölga gul­bú­um. 

Hægt er að vinna horm­ónið úr blóði hryssa á þessu til­tekna tíma­bili með­göng­unnar og vinna úr því frjó­sem­is­lyf. Það er einna helst notað til að sam­stilla gang­mál dýra, mest í svína­rækt. Frjó­sem­is­lyfið er notað út um allan heim, en í hverf­andi magni á Íslandi. Hryssu­blóði hefur verið safnað úr fyl­fullum hryssum í kjöt­fram­leiðslu hér á landi í um 40 ár, segir í svari Krist­jáns Þórs.

Sam­kvæmt svari ráð­herra og upp­lýs­ingum frá Mat­væla­stofnun var hesta­hald, þar sem fram­kvæmd er blóð­taka úr hrossum til fram­leiðslu afurða, stundað á vegum 95 aðila árið 2019. Ráðu­neytið hafi aftur á móti ekki upp­lýs­ingar um veltu ein­stak­linga og fyr­ir­tækja sem stunda blóð­mera­hald.

Alvar­legar athuga­semdir gerðar á 3 bæjum

Ágúst Ólafur spurði jafn­framt hvernig blóð­mera­hald upp­fylli laga­á­kvæði um dýra­vernd og við hvaða rétt­ar­heim­ild sé stuðst. Í svari ráð­herra kemur fram að um blóð­mera­hald gildi lög um vel­ferð dýra og reglu­gerð um vel­ferð hrossa. 

„Mat­væla­stofnun ann­ast eft­ir­lit með fram­kvæmd lag­anna og reglu­gerð­ar­innar og hefur eft­ir­lit með því að ákvæðum þeirra sé fylgt. Sam­kvæmt upp­lýs­ingum frá Mat­væla­stofnun hafa síð­ustu þrjú ár verið gerðar alvar­legar athuga­semdir á þremur bæjum sem tengj­ast blóð­mera­haldi og var blóð­mera­haldi þá hætt á við­kom­andi bæj­u­m.“

Þing­mað­ur­inn spurði í síð­asta lagi í hvaða Evr­ópu­ríkjum blóð­mera­hald hafi verið aflagt en sam­kvæmt svar­inu hefur ráðu­neytið ekki upp­lýs­ingar um blóð­mera­hald í öðrum ríkj­um.