Gauti Geirs­son er nýjasti aðstoð­ar­maður ráð­herra í rík­is­stjórn Íslands. Hann var ráð­inn í hálft starf í gær. Umræður hafa spunn­ist upp um ráðn­ing­una, en það er langt frá því í fyrsta skiptið sem það ger­ist. Fyrir tæpu ári síðan sagði umboðs­maður Alþing­is, Tryggvi Gunn­ars­son, að hann teldi að ráð­herrar þyrftu reynda ráð­gjafa til að vega upp á móti sínu eigin reynslu­leysi. Það væri meðal ann­ars sá lær­dómur sem draga mætti af leka­mál­inu, sem þá var enn í hámæli. 

„Þarna kemur til starfa fólk sem hefur ekki það sem ég kalla mikla sam­fé­lags­reynslu. Það hefur ekki veru­lega reynslu af þing­störf­um, ekki af þessum sam­skiptum að koma málum í gegnum stjórn­sýsl­una, það hefur oft á tíðum ekki mikla reynslu úr atvinnu­líf­inu, það hefur kannski fyrst og fremst reynslu úr póli­tískum störfum fyrir stjórn­mála­flokk­ana,“ sagði Tryggvi um ráð­herra. Hann sagð­ist telja að búa þurfi ráð­herrum betri aðstöðu til að rækja störf sín, reynda aðstoð­ar­menn sem gætu veitt hlut­lausa ráð­gjöf í sam­ræmi við góða stjórn­sýslu­hætti.

Kjarn­inn tók saman reynslu þeirra fimmtán ein­stak­linga sem gegna starfi aðstoð­ar­manns ráð­herra í rík­is­stjórn­inni. Öll nema eitt eru með háskóla­gráðu, og meiri­hluti þeirra hafði starfað fyrir flokk við­kom­andi ráð­herra áður en þau voru ráðin í störf aðstoð­ar­manna. 

Aðstoð­ar­menn ­for­sæt­is­ráð­herra

Jóhannes Þór Skúla­son er fæddur árið 1973 og er 43 ára. Hann er með BA-­próf í sagn­fræði frá Háskóla Íslands og starf­aði sem grunn­skóla­kenn­ari í Selja­skóla þar til hann tók við starfi aðstoð­ar­manns for­manns Fram­sókn­ar­flokks­ins, Sig­mundar Dav­íðs Gunn­laugs­son­ar, árið 2011. Hann var líka um margra ára skeið þjálf­ari MOR­FÍS-liða í hjá­verk­um. Þegar Sig­mundur Davíð varð for­sæt­is­ráð­herra í maí 2013 tók Jóhannes við starfi aðstoð­ar­manns for­sæt­is­ráð­herra. Hann hafði ekki starfað í Fram­sókn­ar­flokknum fyrir þennan tíma en var mjög virkur í starfi InDefence-hóps­ins, og bauð sig fram til stjórn­laga­þings árið 2010.

Matth­ías Páll Ims­land er fæddur árið 1974 og er 42 ára gam­all. Hann lauk BA-­prófi í stjórn­mála­fræði frá Háskóla Íslands árið 1998 og er með MS-­próf frá Háskól­anum í Lundi. Hann hefur einnig stundað nám í við­skipta­fræði við HÍ og stjórn­un­ar­nám við North Park Uni­versity í Chicago. Matth­ías hefur gegnt ýmsum trún­að­ar­störfum fyrir Fram­sókn­ar­flokk­inn í gegnum tíð­ina. Meðal ann­ars hefur hann verið í mið­stjórn og lands­stjórn flokks­ins. Hann starf­aði sem rekstr­ar­stjóri þjón­ustu­deildar Sím­ans eftir nám og hefur starfað sem sviðs­stjóri fræðslu-, félags- og menn­ing­ar­sviðs á Blöndu­ósi og í iðn­að­ar- og við­skipta­ráðu­neyt­inu. Hann var for­stjóri Iceland Express til árs­ins 2011 og svo fram­kvæmda­stjóri rekstr­ar­sviðs WOW-air til 2012. Hann vann sem ráð­gjafi eftir það og var svo kosn­inga­stjóri Fram­sókn­ar­flokks­ins í Suð­vest­ur­kjör­dæmi fyrir síð­ustu Alþing­is­kosn­ing­ar. Eftir það var hann aðstoð­ar­maður Eyglóar Harð­ar­dóttur félags- og hús­næð­is­mála­ráð­herra, þangað til nú í árs­byrjun er hann varð aðstoð­ar­maður Sig­mundar Dav­íðs Gunn­laugs­son­ar. 

Aðstoð­ar­menn fjár­mála­ráð­herra

Svan­hild­ur Hólm Vals­dóttir er fædd árið 1974 og er 41 árs göm­ul. Hún er ­mennt­aður lög­fræð­ingur og lauk prófi frá Háskóla Íslands­ árið 2009. Hún starf­aði í fjöl­miðlum frá 1995 til 2009, sem ­blaða­mað­ur, útvarps­maður og síð­ast í sjón­varpi, bæði á RÚV og Stöð 2. Hún var ráðin fram­kvæmda­stjóri þing­flokks ­Sjálf­stæð­is­flokks­ins haustið 2009 og svo aðstoð­ar­maður Bjarna Bene­dikts­sonar haustið 2012. Hún fylgdi Bjarna svo í fjár­mála­ráðu­neytið þegar hann varð ráð­herra vorið 2013. Hún hafði sinnt félags­störfum fyrir Sjálf­stæð­is­flokk­inn, og var í stjórn og svo annar vara­for­maður SUS árin 1997 til 2001.

Teit­ur ­Björn Ein­ars­son er fæddur árið 1980 og er 35 ára. Hann er lög­mað­ur, útskrif­að­ist frá Háskóla Íslands 2006 og öðl­að­ist ­mál­flutn­ings­rétt­indi fyrir hér­aðs­dómi 2007. Hann starf­aði hjá LOGOS lög­manns­stofu eftir útskrift, var í fram­kvæmda­stjórn og ­stjórn Eyr­ar­odda 2007 til 2011 og svo lög­maður hjá OPUS lög­mönn­um frá 2011 og þar til hann var ráð­inn í fjár­mála­ráðu­neyt­ið sum­ar­ið 2014. Teitur hefur gegnt trún­að­ar­störfum fyrir Sjálf­stæð­is­flokk­inn, var vara­for­maður SUS og hefur setið í ráðum og nefnd­um ­flokks­ins. Hann hefur einnig boðið sig fram í próf­kjöri fyr­ir­ Al­þing­is­kosn­ing­ar.

Aðstoð­ar­menn ut­an­rík­is­ráð­herra

Sunna G­unn­ars Mart­eins­dóttir er fædd árið 1984 og er 31 ára göm­ul. Hún er með BA-gráðu í almanna­tengslum frá Háskól­anum í West­min­ster, og hefur stundað nám í hag­nýtri menn­ing­ar­miðlun í Há­skóla Íslands. Áður en hún varð aðstoð­ar­maður Gunn­ar­s Braga Sveins­sonar utan­rík­is­ráð­herra í sept­em­ber 2013 var hún skrif­stofu­stjóri þing­flokks Fram­sókn­ar­flokks­ins frá árin­u 2010, og var aðstoð­ar­maður kosn­inga­stjóra flokks­ins árið 2009. Hún var líka til skamms tíma aðstoð­ar­maður for­manns Fram­sókn­ar­flokks­ins. Hún hefur gegnt ýmsum félags­störf­um, og ­setið í nefndum á vegum Fram­sókn­ar­flokks­ins.

Gaut­i ­Geirs­son er fæddur árið 1993 og er 22 ára gam­all. Hann er nemi í Há­skól­anum í Reykja­vík þar sem hann lærir rekstr­ar­verk­fræð­i. Hann er í hálfu starfi í ráðu­neyt­inu til að byrja með. Gaut­i hefur starfað sem háseti og vél­stjóri á tog­ara og far­þega­skip­um. Hann var kosn­inga­stjóri hjá Fram­sókn­ar­flokknum á Ísa­firði í síð­ustu kosn­ingum og skipar 15. sætið á lista flokks­ins í Norð­vest­ur­kjör­dæmi nú. Hann er einnig for­maður Félags ungra fram­sókn­ar­manna á norð­an­verðum Vest­fjörðum og rit­ari Félags­ ungra fram­sókn­ar­manna. 

Aðstoð­ar­menn mennta­mála­ráð­herra 

Sig­ríður Hall­gríms­dóttir er fædd árið 1971 og er 45 ára. Hún er með MBA-gráðu frá Háskól­anum í Reykja­vík. Áður en hún tók við starfi aðstoð­ar­manns Ill­uga Gunn­ars­sonar var hún ráð­gjafi hjá almanna­tengsla­fyr­ir­tæk­inu KOM. Hún hefur meðal ann­ars starfað sem fram­kvæmda­stjóri hjá Sjá, aðstoð­ar­fram­kvæmda­stjóri hjá Credit­info Group og hjá Industria. Hún hefur einnig setið í stjórnum nokk­urra fyr­ir­tækja. Hún hefur einnig setið í stjórnum félaga­sam­taka og verið virk í störfum fyrir Sjálf­stæð­is­flokk­inn. Hún var for­maður Hvat­ar, félags sjálf­stæð­iskvenna í Reykja­vík. 

Jóhannes Stef­áns­son er fæddur árið 1988 og er 27 ára. Hann er hér­aðs­dóms­lög­mað­ur, með BA- og meistara­gráðu í lög­fræði frá HR, sem hann lauk árið 2014. Hann var ráð­inn aðstoð­ar­maður í októ­ber síð­ast­liðn­um, en þá hafði hann starfað sem blaða­maður á Við­skipta­blað­inu um nokk­urt skeið. Hann vann einnig áður sem blaða­maður á Frétta­blað­inu og frétta­maður á Stöð 2. Hann hefur líka starfað fyrir sendi­ráð Banda­ríkj­anna í Reykja­vík, hjá Arion banka og LEX lög­manns­stofu. 

Jóhannes var for­maður Týs, félags ungra sjálf­stæð­is­manna í Kópa­vogi, frá 2011 til 2013 og sat í aðal­stjórn Sam­bands ungra sjálf­stæð­is­manna árið 2011 til 2013

Aðstoð­ar­menn inn­an­rík­is­ráð­herra

Þór­dís Kol­brún Reyk­fjörð Gylfa­dóttir er fædd árið 1987 og er 28 ára. Hún lauk ML námi í lög­fræði frá Háskól­anum í Reykja­vík árið 2012 og var fram­kvæmda­stjóri þing­flokks Sjálf­stæð­is­manna frá vori 2013 og þar til hún var ráðin aðstoð­ar­maður Ólafar Nor­dal inn­an­rík­is­ráð­herra rétt fyrir jólin 2014. Hún hefur starfað hjá emb­ætti sýslu­manns á Akra­nesi, hjá úrskurð­ar­nefnd umhverf­is- og auð­linda­mála og hjá Mar­el. Hún var kosn­inga­stjóri Sjálf­stæð­is­flokks­ins í Norð­vest­ur­kjör­dæmi fyrir síð­ustu þing­kosn­ing­ar. Hún hefur verið virk í störfum fyrir Sjálf­stæð­is­flokk­inn, verið for­maður félags ungra sjálf­stæð­is­manna á Akra­nesi og setið í stjórn SUS.

Kristín Har­alds­dóttir er fædd árið 1970 og er 45 ára. Hún er lög­fræð­ingur frá Háskóla Íslands og er með LLM-gráðu í Evr­ópu­rétti frá Háskól­anum í Lundi. Hún hefur starfað sem full­trúi á lög­mann­stofu, var lög­fræð­ingur í sjáv­ar­út­vegs­ráðu­neyt­inu og iðn­að­ar- og við­skipta­ráðu­neyt­inu í sex ár og síðar lög­fræði­legur aðstoð­ar­maður dóm­ara við EFTA-­dóm­stól­inn í Lúx­em­borg. Hún hefur verið sér­fræð­ingur við laga­deild Háskól­ans í Reykja­vík frá 2009 og for­stöðu­maður Auð­linda­rétt­ar­stofn­unar laga­deild­ar­inn­ar. Hún hefur einnig setið í stjórnum fyr­ir­tækja og nefndum á vegum rík­is­ins. Hún var ráðin lög­fræði­legur aðstoð­ar­maður Ólafar Nor­dal  í des­em­ber 2014.

Aðstoð­ar­menn sjáv­ar­út­vegs- og land­bún­að­ar­ráð­herra 

Bene­dikt Sig­urðs­son er fæddur árið 1964 og er 51 ára gam­all. Hann er með BA-gráðu í sagn­fræði frá Háskóla Íslands. Hann var ráð­inn aðstoð­ar­maður Sig­urðar Inga  í ágúst 2013  en var  fyrir það sviðs­stjóri sam­skipta hjá Act­a­vis á Íslandi. Hann var aðstoð­ar­maður Sig­mundar Dav­íðs Gunn­laugs­sonar frá 2009 til 2011 og 2006 til 2008 var hann fjöl­miðla­full­trúi hjá Kaup­þingi. Tólf ár þar á undan vann hann sem frétta­mað­ur.

Ágúst Bjarni Garð­ars­son er fæddur árið 1987 og er 28 ára gam­all. Hann er með BA próf í stjórn­mála­fræði og meist­ara­próf í verk­efna­stjórnun frá Háskól­anum í Reykja­vík, en því námi lauk hann síð­ast­liðið vor. Ágúst tók við starfi aðstoð­ar­manns Sig­urðar Inga Jóhanns­sonar í maí síð­ast­liðn­um, en áður hafði hann verið ráð­inn í tíma­bundin verk­efni hjá utan­rík­is­ráðu­neyt­in­u. 

Hann hefur verið for­maður Sam­bands ungra fram­sókn­ar­manna frá því í febr­úar 2015, en áður var hann einnig vara­for­maður félags­ins. Hann er einnig odd­viti Fram­sókn­ar­flokks­ins í Hafn­ar­firð­i. 

Aðstoð­ar­maður umhverf­is­ráð­herra 

Ing­veldur Sæmunds­dóttir er aðstoð­ar­maður umhverf­is- og auð­linda­ráð­herra. Hún er fædd árið 1970 og er 45 ára göm­ul. Hún er með BS-­próf frá CBS, við­skipta­há­skól­anum í Kaup­manna­höfn, og diplómu í alþjóð­legri mark­aðs­hag­fræði frá Business Academy Copen­hagen North. Hún hefur líka stundað nám í stjórnun og stefnu­mótun í Háskóla Íslands. Hún starf­aði sem versl­un­ar­stjóri og síðar vöru­stjóri hjá Penn­an­um, og sem vöru­stjóri hjá Hátækni. Hún var svo kosn­inga­stjóri Fram­sókn­ar­flokks­ins í Reykja­vík fyrir síð­ustu þing­kosn­ingar og var svo ráðin aðstoð­ar­mað­ur  þegar rík­is­stjórnin var mynduð.

Aðstoð­ar­maður heil­brigð­is­ráð­herra

Inga Hrefna Svein­bjarn­ar­dóttir er fædd árið 1981 og er 34 ára göm­ul. Hún er með BA-­próf í stjórn­mála­fræði frá Háskóla Íslands, sem hún lauk árið 2012. Hún starf­aði á skrif­stofu Sjálf­stæð­is­flokks­ins í Val­höll frá árinu 2007 til hausts­ins 2012, þegar hún tók við starfi fram­kvæmda­stjóra þing­flokks Sjálf­stæð­is­flokks­ins. Hún var svo ráðin aðstoð­ar­maður Krist­jáns Þórs Júl­í­us­sonar heil­brigð­is­ráð­herra í júní 2013.

Aðstoð­ar­maður iðn­að­ar- og við­skipta­ráð­herra

Ingvar Pétur Guð­björns­son er fæddur árið 1979 og er 36 ára gam­all. Hann er búfræð­ingur frá Land­bún­að­ar­há­skól­anum á Hvann­eyri. Hann hefur einnig lagt stund á stjórn­mála­fræði og sagn­fræði í Háskóla Íslands. Áður en hann varð aðstoð­ar­maður Ragn­heiðar Elínar Árna­dótt­ur  árið 2013  starf­aði hann sem blaða­maður á Morg­un­blað­inu í átján mán­uði. Áður starf­aði hann hjá Lands­virkj­un, við almanna­tengsl og kynn­ing­ar­mál, og við skrif­stofu­störf hjá Slát­ur­hús­inu á Hellu. Hann sat í sveit­ar­stjórn Rangár­þings ytra 2002 til 2010 og aftur frá 2011 til 2012. Hann hefur verið mjög virkur í starfi Sjálf­stæð­is­flokks­ins, meðal ann­ars í stjórn SUS og í full­trúa- og kjör­dæm­is­ráð­um.