Síma­skrá­in, sem hefur komið út í 110 ár, frá árinu 1905, kemur út í síð­asta sinn á næsta ári. Þetta kemur fram í til­kynn­ingu frá Já hf. sem gefur úr síma­skránna. Upp­lýs­ingar um síma­númer ein­stak­linga og fyr­ir­tækja verða áfram aðgengi­leg á raf­rænan hátt.

Mar­grét Gunn­laugs­dótt­ir, vöru- og við­skipta­stjóri Já, segir þessa ákvörðun vera tekna í takti við nýja tíma. „Það hefur verið mjög ánægju­legt að standa að útgáfu Síma­skrár­innar síð­ast­liðin 9 ár og ávallt góður andi í kringum þetta verk­efni hjá okk­ur.  Við hjá Já komum til með að  sakna Síma­skrár­innar eins og eflaust margir sem hafa alist upp við það að fletta henni. Breyttir tímar kalla á breyttar áherslur en að sjálf­sögðu sinnum við áfram upp­lýs­inga­gjöf um síma­númer lands­manna í miðlum okkar í takt við þarfir neyt­enda."

Vegna þess­ara tíma­móta mun koma út hátíð­ar­út­gáfa af Síma­skránni á næsta ári. Stefán Páls­son sagn­fræð­ingur hefur verið ráð­inn til að skrá sögu hennar sem mun þá telja 111 ár.Hann segir varla hægt að hugsa sér hvers­dags­legri hlut en Síma­skránna, fyr­ir­bæri sem hafi verið til á hverju heim­ili frá því að hann man eftir sér. „En það er einmitt svo skemmti­legt að skoða þessa hvers­dags­legu hluti í nærum­hverf­inu og upp­götva að þeir eiga sér líka sögu og hafa þró­ast í takt við sam­fé­lag­ið. Síma­skráin hefur komið út á hverju ári í meira en öld og er þess vegar líka sam­fé­lags­speg­ill. Ég hlakka til að kafa oní þessa sögu og skoða gamlar skrár með hag­nýtum leið­bein­ingum um allt frá notkun sím­tækja yfir í hvernig bregð­ast skuli við kjarn­orku­styrj­öld. Hver man ekki eftir tölvu­síma­skránni sem hægt var að kaupa á disk­ettu? Eða síma­skránni sem Jón Páll reif í beinni útsend­ingu hjá Hemma Gunn? Og svo má rifja upp fyrstu síma­skrána í Banda­ríkj­unum sem inni­hélt bara nöfn en engin síma­núm­er."

 Í til­kynn­ing­unni segir að „For­síða Síma­skrár­innar hefur haft menn­ing­ar­legt gildi og end­ur­speglað tíð­ar­and­ann í sam­fé­lag­inu hverju sinni. Hönnun á for­síðu þess­arar síð­ustu Síma­skrár verður í höndum Guð­mundar Odds Magn­ús­sonar (Godds) pró­fess­ors við Hönn­un­ar- og arki­tekt­úr­deild Lista­há­skóla Íslands.Fyrsta Síma­skráin var gefin út af Tal­síma­fé­lag­inu árið 1905 og sátu meðal ann­ars Thor Jen­sen, athafna­mað­ur, Klem­enz Jóns­son, land­rit­ari, og Knud Zim­sen, bæj­ar­verk­fræð­ingur og síðar borg­ar­stjóri í Reykja­vík, í stjórn félag­ins. Skráin inni­hélt 165 síma­númer og var alls 13 blað­síð­ur."

Goddur segir að við­hafn­ar­síma­skráin muni þurfa að hafa lengri líf­tíma en aðr­ar. Hún þurfi helst að vera tíma­laus og vinur sem flestra.