Áhrif á fjárfestingar Sjóvár verða neikvæð um 155 milljónir vegna GAMMA sjóðs

Eigið fé fjárfestingarsjóðs GAMMA, sem var 4,4 milljarðar króna um síðustu áramót, hefur nær þurrkast út eftir endurmat á eignum. Tryggingafélag, sem er meðal annars í eigu lífeyrissjóða, hefur fært niður virði fjárfestinga sinna vegna þessa.

Þórður Snær Júlíusson 30. september 2019

Tryggingafélagið Sjóvá, sem er skráð á aðalmarkað Kauphallar Íslands, hefur greint frá því að endurmat á virði GAMMA: Novus, fjárfestingasjóðs í stýringu hjá GAMMA sem á Upphaf fasteignafélag, leiði til þess að áhrif á fjárfestingastarfsemi Sjóvár á árinu verði neikvæð um 155 milljónir króna.

Þetta kemur fram í tilkynningu til Kauphallar sem birt var rétt í þessu. Ekki kemur fram í tilkynningunni hver heildareign Sjóvá er í sjóðnum. Á meðal stærstu eigenda Sjóvár eru lífeyrissjóðurinn Gildi, Frjálsi lífeyrissjóðurinn, Lífeyrissjóður verzlunarmanna, Lífeyrissjóður starfsmanna ríkisins og Birta lífeyrissjóður auk einkafjárfesta.

Fyrr í dag sendi Kvika banki, sem keypti GAMMA síðastliðið vor, frá sér tilkynningu til Kauphallar Íslands þar sem greint var frá því að tveir fagfjárfestasjóðir, Novus og Anglia, hefðu verið í mun verra ásigkomulagi en gert hafði verið ráð fyrir og að skráð gengi þeirra hefði verið lækkað sem því nemur. Í tilkynningunni var hins vegar ekki greint frá því um hversu mikið sjóðirnir voru færði niður.

Kjarninn greindi hins vegar frá því fyrr í dag að eftir nýlegt eignarmat á eignum GAMMA: Novus hafi eigið fé hans verið fært úr 4,4 milljörðum króna um síðust áramót niður í 40 milljónir króna. Því hefur eigið fé sjóðsins nánast þurrkast út.

Í einblöðungi sem sendur var til hlutdeildarskírteinishafa í sjóðnum í dag, 30. september, sagði að staða Upphafs fasteignarfélags sé þannig að það glími „nú við lausafjárvanda en nýir stjórnendur hafa lagt fram áætlun um framtíð félagsins þar sem m.a. er unnið að viðbótarfjármögnun til að mæta lausafjárvandanum. Unnið er að útgáfu nýs forgangsskuldabréfs að fjárhæð 1 ma.kr. til að klára þær framkvæmdir sem félagið hefur með höndum til að hámarka virði eigna. Gert er ráð fyrir að niðurstöður viðræðna um frekari fjármögnun liggi fyrir um miðjan október 2019.“

Hlutdeildarskírteinishafar verða upplýstir um fjármögnun félagsins um leið og niðurstaða liggur fyrir, samkvæmt því sem fram kemur í skjalinu. „Nýtt bráðabirgðagengi sjóðsins byggir á því að áform um viðbótarfjármagn gangi eftir. Samhliða endurmati eigna og vinnu við fjármögnun hefur félagið styrkt teymið sem hefur umsjón með framkvæmdum með ráðningu byggingarverkfræðings og byggingartæknifræðings sem samtals búa yfir 40 ára reynslu úr byggingargeiranum.“

Við þurfum á þínu framlagi að halda

Þú getur tekið beinan þátt í að halda úti öflugum fjölmiðli.

Við sem vinnum á ritstjórn Kjarnans viljum hvetja þig til að vera með okkur í liði og leggja okkar góða fjölmiðli til mánaðarlegt framlag svo við getum haldið áfram að vinna fyrir lesendur, fyrir fólkið í landinu.

Kjarninn varð níu ára í sumar. Þegar hann hóf að taka við frjálsum framlögum þá varð slagorðið „Frjáls fjölmiðill fyrir andvirði kaffibolla“ til og lesendur voru hvattir til að leggja fram í það minnsta upphæð eins kaffibolla á mánuði.

Mikið vatn hefur runnið til sjávar á þeim níu árum sem Kjarninn hefur lifað. Í huga okkar á Kjarnanum hefur þörfin fyrir fjölmiðla sem veita raunverulegt aðhald og taka hlutverk sitt alvarlega aukist til muna.

Við trúum því að Kjarninn skipti máli fyrir samfélagið.

Við trúum því að sjálfstæð og vönduð blaðamennska skipti máli.

Ef þú trúir því sama þá endilega hugsaðu hvort Kjarninn er ekki allavega nokkurra kaffibolla virði á mánuði.

Vertu með okkur í liði. Þitt framlag skiptir máli.

Ritstjórn Kjarnans: Sunna Ósk Logadóttir, Þórður Snær Júlíusson, Erla María Markúsdóttir, Arnar Þór Ingólfsson, Eyrún Magnúsdóttir og Grétar Þór Sigurðsson.

Já takk, ég vil styrkja Kjarnann!

Orðafjöldi: 431 Færslan var síðast uppfærð: 30. september 2019, kl. 15:20
Færslan birtist fyrst: 30. september 2019, kl. 15:01

Í upphaflegri útgáfu fréttarinnar kom fram að afkoma fjárfestinga Sjóvár yrði neikvæð um 155 milljónir króna vegna niðurfærslu á eignum GAMMA: Novus. Það er ekki rétt heldur færði Sjóvá niður fjárfestingaafkomu sína um 155 milljónir króna vegna málsins. Þetta hefur verið leiðrétt í fréttinni og beðist er afsökunar á mistökunum.