Fjár­mála- og efna­hags­ráðu­neytið segir að því fari fjarri að það hafi beint til­mælum til Banka­sýslu rík­is­ins sem hafi falið í sér til­raun til að reyna að hlut­ast til um skipan stjórn­ar­for­manns fjár­mála­fyr­ir­tæk­is. Í umsögn um frum­varp um lög um með­ferð eign­ar­hluta rík­is­ins í fjár­mála­fyr­ir­tækjum segir Jón Gunnar Jóns­son,  for­stjóri Banka­sýsl­unn­ar, að Guð­mundur Árna­son, ráðu­neyt­is­stjóri í fjár­mála- og efna­hags­ráðu­neyt­inu, hafi reynt að hlut­ast til um skipan stjórn­ar­for­manns fjár­mála­fyr­ir­tækis sem ríkið á eign­ar­hlut í með sím­tölum við sig í júní og júlí 2014. Hann hafi einnig reynt að fá stjórn­ar­fundi í sama fyr­ir­tæki frestað. Jón Gunnar seg­ist hafa mót­mælt þessum afskiptum sem hann taldi ekki í sam­ræmi við lög og að hann hafi auk þess upp­lýst stjórn stofn­un­ar­innar um þau.

Kjarn­inn sendi fyr­ir­spurn til fjár­mála- og efna­hahags­ráðu­neyt­is­ins og óskaði eftir við­brögðum vegna þess­ara ásak­ana. Í skrif­legu svari ráðu­neyt­is­ins segir að þegar sam­ein­ing Spari­sjóðs Bol­ung­ar­víkur við Spari­sjóð Norð­ur­lands stóð fyrir dyrum í júlí 2014 hafi verið óein­ing um sam­ein­ing­una og að hætta var á að hún myndi ekki ganga eftir vegna óánægju heima­manna á Bol­ung­ar­vík­. „Fjár­mála- og efna­hags­ráð­herra óskaði eftir því við ráðu­neyt­is­stjóra að þessum upp­lýs­ingum um óánægju heima­manna yrði komið á fram­færi við Banka­sýslu rík­is­ins þannig að leita mætti leiða til að tryggja sam­stöðu um sam­ein­ingu þess­ara tveggja spari­sjóða í sam­ræmi við mark­mið eig­enda­stefnu rík­is­ins fyrir fjár­mála­fyr­ir­tæki, þar sem segir að stuðla skuli að hag­ræð­ingu í fjár­mála­kerf­inu, og stefnu Banka­sýsl­unn­ar. Ræddi ráðu­neyt­is­stjóri í fram­haldi af því við bæði þáv. for­mann stjórnar Banka­sýslu rík­is­ins og forstjóra stofn­un­ar­innar þar sem þessum áhyggjum og sjón­ar­miðum var komið á fram­færi. Í þeim sam­tölum kom fram að e.t.v. væri mögu­leiki að seinka boð­uðum stjórn­ar­fundi hins sam­ein­aða spari­sjóðs ef það mætti verða til að tryggja að sátt gæti orðið um fram­hald máls­ins.

Ekki var af hálfu ráðu­neyt­is­ins óskað eftir sér­stökum trún­aði um þessi sam­töl og því fer fjarri að þessi sam­töl hafi falið í sér til­mæli af hálfu ráðu­neyt­is­ins, enda er sér­stak­lega kveðið á um veit­ingu til­mæla frá ráðu­neyt­inu til stofn­un­ar­innar í lögum um Banka­sýslu rík­is­ins“.

Í svari ráðu­neyt­is­ins kemur einnig fram að málið hafi verið rætt innan þáver­andi stjórnar Banka­sýsl­unn­ar.