EPA

Litla stúlkan með sérstæðu augun

Myndir af Madelaine McCann eru enn á ný komnar á forsíður blaða, þrettán árum eftir að hún, þá tæpra fjögurra ára, hvarf sporlaust í Portúgal. Í þýskri borg situr karlmaður í fangaklefa grunaður um að hafa rænt henni og skaðað – maður sem hefur ítrekað gerst sekur um kynferðisbrot.

Hún væri orðin 17 ára. Rétt rúm­lega. Lík­lega farin að hlakka til háskóla­náms á næsta ári. Jafn­vel að skoða náms­skrárn­ar, máta við sig hin og þessi starfs­heiti. Ætti hún að verða læknir eins og for­eldr­arn­ir? Eða eitt­hvað allt ann­að?



En Madel­eine McCann er ekki að fara í háskóla. Hún hvarf tæp­lega fjög­urra ára gömul og lést lík­lega skömmu síð­ar. Litla stúlkan með sér­stæðu augun fékk ekki að vaxa úr grasi og verða að ungri konu.



Enn einu sinni eru farnar að birt­ast fréttir um bresku stúlk­una sem hvarf í maí árið 2007 er hún var með for­eldrum sínum og systk­inum í fríi í strandbæ í Portú­gal. Þetta var rétt fyrir fjög­urra ára afmæl­is­dag­inn henn­ar. Harm­leik­ur­inn um hvarf Madel­eine McCann hefur verið frétta­efni allar götur síð­an. Fyrstu árin á hverjum ein­asta degi. Sjaldnar árin á eftir en þó í bylgj­um. Það hefur stöðugt verið leitað að barn­inu. Margir hafa legið undir grun um að hafa rænt henni.



Stundum hefur lög­reglan talið sig komna á spor­ið. Stundum hefur fólk talið sig sjá hana, jafn­vel í öðrum heims­álf­um. Þá hafa fjöl­miðl­arnir tekið við sér, rifjað upp mál­ið, rætt við rann­sak­end­ur, ætt­ingja og stundum þá sem sér­hæfa sig í sam­sær­is­kenn­ingum af öllu tagi. Var ekki eitt­hvað grun­sam­legt hvað for­eldr­arnir sýndu litlar til­finn­ing­ar? Eru þau ekki lík­legir ger­end­ur? Það voru jú breskir for­eldrar sem hentu líki ungs sonar síns í ruslagám í Portú­gal nokkrum árum fyrr. Og hvað var þetta fólk að hugsa að skilja börnin eftir ein í hót­el­her­berg­inu?



For­eldr­arnir hafa fyrir löngu verið hreins­aðir af öllum grun. En þau hafa aldrei hætt að vekja athygli á hvarfi dóttur sinn­ar.



Auglýsing

  Snemma í júní síð­ast­liðnum dró enn á ný til tíð­inda: Lög­reglu­yf­ir­völd greindu frá því að þýskur fangi lægi nú undir grun um aðild að hvarfi Madel­eine. Þýska lög­reglan sagð­ist rann­saka málið sem morð og ganga út frá því að stúlkan væri lát­in. „Við munum aldrei gefa upp von­ina um að Madel­eine finn­ist á líf­i,“ sögðu for­eldrar henn­ar, Kate og Gerry McCann í kjöl­far­ið. „En hver sem nið­ur­staðan verður þá þurfum við að vita hvað kom fyrir hana og finna frið.“



Kate og Gerry hafa leitað dóttur sinnar í þrettán ár. Fyrir jafn­mörgum árum stóðu þau dag­lega á tröppum íbúðar í Praia da Luz í Portú­gal og báðu alla um aðstoð. Höfðu ein­hverjir séð hana? Stúlk­una með ljósa, slétta hárið og dep­il­inn í hægra aug­anu? Var mann­ræn­ing­inn að hlusta? Vildi hann vera svo vænn að skila dótt­ur­inni?



Garry og Kate McCann fyrir utan íbúðina í Portúgal eftir hvarf dóttur þeirra.
EPA

Það kann vel að vera að hinn 43 ára Christ­ian Brückner, sem situr nú í fang­elsi fyrir kyn­ferð­is­brot, hafi verið að hlusta. Hann bjó í Portú­gal á árunum 1995-2007, í nágrenni við sum­ar­dvala­stað­inn þar sem Madel­eine og fjöl­skylda voru í fríi. Hann hefur einnig verið dæmdur fyrir barn­a­níð – oftar en einu sinni. Sautján brot eru á saka­skrá hans. Þýska lög­reglan segir hann þekktan fyrir inn­brot í sum­ar­hús og hótel og sölu fíkni­efna í bæði heima­land­inu og Portú­gal en þangað hafði hann flúið aðeins átján ára gam­all til að kom­ast hjá því að fara í fang­elsi.



Afskipti lög­regl­unnar af honum hófust er hann var ung­ling­ur. Árið 1994 var hann dæmdur fyrir kyn­ferð­is­brot gegn barni, til­raun til kyn­ferð­is­brots gegn barni og fyrir að hafa við­haft kyn­ferð­is­lega til­burði fyrir framan barn. En þar með er ekki öll saga hans sögð.



Hann hefur einnig verið dæmdur fyrir brot gegn aldr­aðri konu. Sú var 72 ára árið 2005 er Brückner réðst á hana á heim­ili hennar við strönd­ina í Lagos í Portú­gal. Árásin var mjög grimmi­leg. Brückner braust inn í hús­ið, batt gömlu kon­una, barði hana með bar­efli og nauðg­aði henni. Portú­galska lög­reglan hóf rann­sókn en hætti henni ári síð­ar. Það var ekki fyrr en í fyrra, fjórtán árum eftir nauðg­un­ina, að Brückner var sak­felldur fyrir ofbeldið og dæmdur til sjö ára fang­els­is­vist­ar. Þá var fórn­ar­lamb hans orðið 86 ára gam­alt.



Við rétt­ar­höldin greindu vitni frá því að Brückner hefði stært sig af því að brjót­ast inn á gisti­staði  ferða­manna í Portú­gal til að stela verð­mæt­um. Eitt vitnið sagð­ist hafa séð hann fara inn um glugga á sum­ar­húsi.



Sumardvalarstaðurinn Praia da Luz í Portúgal er enn og aftur kominn í fréttir vegna hvarfs bresku stúlkunnar.
EPA

Í meira en ald­ar­fjórð­ung flutti Brückner fram og til baka milli Þýska­lands og Portú­gal – oft til að kom­ast undan rétt­vís­inni. Á þeim tíma sem McCann-­fjöl­skyldan var í fríi í Portú­gal og dag­inn sem Madel­eine hvarf, er hann tal­inn hafa verið þar. Hann starf­aði sem þjónn en var alltaf blankur og í leit að betur laun­aðri vinnu. Þá átti hann sendi­bíl og einnig gamlan jagú­ar. Sá bíll er meðal gagna í mál­inu nú.



Lund­úna­lög­reglan seg­ist fyrst hafa fengið ábend­ingu um Brückner árið 2017 er hún óskaði enn einu sinni eftir upp­lýs­ingum um málið – tíu árum eftir hvarf­ið. Nafn hans er þó talið hafa komið inn á borð lög­regl­unnar í Þýska­landi nokkrum árum fyrr eða árið 2013 í kjöl­far sjón­varps­þáttar um málið sem sýndur var þar í landi.



Þýska lög­reglan telur að Madel­eine sé látin en hefur ekki gefið upp hvaða sann­anir hún hafi fyrir því. Breska lög­reglan hefur þó ekki gefið út slíka yfir­lýs­ingu og segir málið enn rann­sakað sem mann­rán.



Auglýsing

Nú situr Brückner reyndar í varð­haldi í þýsku borg­inni Kiel. Og dómur hans fyrir nauðg­un­ina hrotta­legu er í end­ur­skoðun að kröfu lög­fræð­inga hans sem segja að hann hafi verið fram­seldur frá Ítalíu til Þýska­lands vegna ann­ars brots en hann var svo ákærður fyr­ir. Slíkt segja þeir ekki sam­ræm­ast  fram­sals­reglum Evr­ópu­dóm­stóls­ins.



Eftir að fram kom í byrjun júní að Brückner væri grun­aður um aðild að hvarfi Madel­eine fóru þýska  og portú­galska lög­reglan enn einu sinni að leita að frek­ari vís­bend­ing­um. Í Portú­gal var til að mynda leitað í gömlum brunnum í nágrenni sum­ar­dval­ar­stað­ar­ins Praia da Luz. Ekki hefur verið gefið upp hvort sú leit skil­aði ein­hverjum árangri.



Í gær var svo haf­ist handa við leit í skóg­lendi skammt utan Hanover í Þýska­landi. Ekki hefur heldur verið gefið upp hvort sú leit hafi skilað ein­hverju.  



Litla stúlkan með sér­stæðu augun er enn ófund­in.



Lögreglan leitar vísbendinga í skóglendi við Hanover í Þýskalandi í gær
EPA

Margir hafa velt því fyrir sér hvers vegna fjöl­miðlar um allan heim segja enn í dag fréttir af hvarfi Madel­eine McCann. Því á hverju ári hverfa tug­þús­undir barna. Lík­lega mörg hund­ruð þús­und. Við fáum hins vegar aðeins fréttir af örfáum þeirra. Aðal­lega hvítum börnum á Vest­ur­lönd­um. Fréttir um að þau hafi horf­ið, að þeirra sé leitað og að þau hafi fund­ist. Stundum heil á húfi. En stundum lát­in. Og stundum spyrst ekk­ert til þeirra fram­ar.



Þær eru því ótelj­andi, harm­sög­urnar af börn­unum sem hverfa. Þær eru hins vegar fæstar sagðar opin­ber­lega.



Hvert þess­ara barna á sér ást­vini sem syrgja. En þeir hafa ekki allir sömu fjár­ráð og sama aðgang að fjöl­miðlum og lækna­hjónin Kate og Gerry McCann. Og þar að auki að breskum fjöl­miðlum sem eru þekktir fyrir upp­slátt og til­finn­inga­þrungnar fyr­ir­sagn­ir. Sagt er að yfir­menn hjá Sky News, sem áttu alltaf í góðu sam­bandi við McCann-hjón­in, hafi fyr­ir­skipað að slá ætti frétt af hvarfi litlu stúlkunnar upp í öðrum hverjum frétta­tíma eða svo.



Ástæð­urnar fyrir því að mál Madel­eine McCann hefur ratað oftar í fjöl­miðla en nokk­urs ann­ars horf­ins barns, eru eflaust jafn­margar og spurn­ing­arnar sem hafa vaknað vegna hvarfs henn­ar.



Hvorki þær né öll fjöl­miðlaum­fjöll­unin breyta því þó að ekk­ert hefur spurst til lít­illar stelpu­hnátu sem sofn­aði sæl og eflaust rjóð í kinnum í sum­ar­fríi á sól­ar­strönd fyrir þrettán árum.

Greinin er byggð á fréttum og frétta­skýr­ingum margra fjöl­miðla, m.a. Guar­dian, New York Times, BBC og CNN.

Styrkir þú Kjarnann?

Kjarninn reiðir sig á framlög lesenda. Með því að styrkja Kjarnann mánaðarlega tekur þú þátt í að halda úti öflugum fjölmiðli.

Kjarninn hefur verið til taks fyrir kröfuharða lesendur í sjö ár og býður almenningi upp á vandaða umfjöllun þar sem áhersla er á gæði og dýpt.  

Ef þú ert nú þegar styrkjandi leyfum við okkur að benda á að hægt er að óska eftir að hækka styrkinn með því að senda póst á takk@kjarninn.is


Já takk, ég vil styrkja Kjarnann!
Meira eftir höfundinnSunna Ósk Logadóttir
Meira úr sama flokkiFréttaskýringar