Gallerí

Tryllt stuð á Iceland Airwaves 2016

Tónlistarhátíðin Iceland Airwaves fer fram í Reykjavík um helgina. Fjöldi fólks tók þátt í partýinu.

Iceland Airwaves-tónlistarhátíðin stendur yfir í Reykjavík um helgina. Fjöldi fólks frá öllum heimshornum lögðu leið sína hingað til lands til þess að vera viðstödd hátíðina í ár. 9.000 miðar seldust á hátíðina í ár, þar af 5.000 miðar til erlendra gesta.

Margar erlendar og innlendar stórstjörnur tróðu upp á hátíðinni ár, sem fram fór á mörgum tónleikastöðum vítt og breitt um höfuðborgina. Meðal þeirra stjarna sem léku í ár má nefna Björk, PJ Harvey, Kate Tempest, FM Belfast, Warpaint og fleiri.

Birgir Þór Harðarson, ljósmyndari Kjarnans, fylgdist með herlegheitunum í gegnum linsuna.

Ljóðskáldið og rapparinn Kött Grá Pjé opnaði hátíðina í Hörpu á miðvikudagskvöldið. Hann var – eins og hann hefur reyndar gert að sið – ber að ofan og búinn að krota á sig.
Mynd: Birgir Þór
Gkr hélt uppi góðu stuði í Silfurbergi í Hörpu á miðvikudagskvöldið. Textarnir hans eru einlægir og miðað við upplifun tónleikagesta þá virðist sú lýsing endurspegla hann sjálfan nokkuð vel.
Mynd: Birgir Þór
Rappkvöldinu á miðvikudaginn lauk í faðmlögum Emmsjé Gauta og Arons Can eftir flutning þeirra á Silfurskottu.
Mynd: Birgir Þór
Óttarr Proppé, þingmaður og formaður Bjartar framtíðar, kom fram með hljómsveit sinni Dr. Spock á fimmtudagskvöld. Óttarr var í sínum litríka búningi og með uppþvottahanskan gula.
Mynd: Birgir Þór
Rokkararnir í Pink Street Boys flokknum stilltu græjurnar í botn á Húrra seint á fimmtudagskvöld.
Mynd: Birgir Þór
Fólk kunni að meta lætin frá Pink Street Boys og flestir stigu léttan dans við sviðið. Sumum fannst það hins vegar ekki nóg og tóku sviðsdýfur yfir áhorfendur.
Mynd: Birgir Þór
Það var öllu rólegri stemmning á tónleikum hljómsveitarinnar Vakar í Listasafni Reykjavíkur á föstudagskvöld.
Mynd: Birgir Þór
Hljómsveitin Vök hefur ekki enn gefið út breiðskífu. Þau Andri Már (sem sést hér undir ljóstýru) og Margrét Rán unnu Músíktilraunir árið 2013.
Mynd: Birgir Þór
Bandaríska hljómsveitin Warpaint tróð upp í Hörpu á föstudagskvöld.
Mynd: Birgir Þór
Ólafur Arnalds í hljómsveitinni Kiasmos mundar græjurnar. Lazer-ljósin dilluðu sér í takt við tónana.
Mynd: Birgir Þór
Þungarokkshljómsveitin Sólstafir lék í Hörpu á föstudagskvöldið. Hér sést söngvari hljómsveitarinnar, Aðalbjörn Tryggvason, kreista fram tónana.
Mynd: Birgir Þór
Fjöldi svokallaðra „off-venue“ tónleika var í boði fyrir þá sem ekki höfðu tryggt sér miða á Iceland Airwaves í ár. Íslenska pönksveitin Hórmónar léku á Slippbarnum snemma á laugardagskvöld.
Mynd: Birgir Þór
Bandaríska hljómsveitin The Internet lék í Valshöllinni á laugardagskvöld.
Mynd: Birgir Þór
Fólk skemmti sér konunglega og lifði sig inn í stemmninguna á tónleikum The Internet.
Mynd: Birgir Þór
Breska ljóðskáldið og rapparinn Kate Tempest fræddi gesti Gamla bíós um heimsmálin á laugardagskvöldið. Óhætt er að mæla sérstaklega með Kate Tempest en hún flytur pólitísk ljóð við þétta tölvutakta.
Mynd: Birgir Þór
Iceland Airwaves 2016 í Hörpu lauk með tónleikum allsherjarpartíbandsins FM Belfast.
Mynd: Birgir Þór

Dagskrá Iceland Airwaves-hátíðarinnar í ár lýkur í kvöld með tónleikum bresku tónlistarkonunnar PJ Harvey í Valshöllinni. 

Ert þú í Kjarnasamfélaginu?

Kjarninn er opinn vefur en líflínan okkar eru frjáls framlög frá lesendum, Kjarnasamfélagið. Sú stoð undir reksturinn er okkur afar mikilvæg.

Með því að skrá þig í Kjarnasamfélagið gerir þú okkur kleift að halda áfram að vinna í þágu almennings og birta vandaðar fréttaskýringar, djúpar greiningar á efnahagsmálum og annað fréttatengt gæðaefni. 

Kjarninn hefur verið til taks fyrir kröfuharða lesendur undanfarin sjö ár og við ætlum okkur að standa vaktina áfram. 

Fyrir þá sem nú þegar eru stoltir styrkjendur Kjarnans þá leyfum við okkur að benda á að hægt er að óska eftir að hækka mánaðarlega framlagið með því að senda póst á takk@kjarninn.is


Já takk, ég vil styrkja Kjarnann!
Efnisflokkar:
Meira úr sama flokkiGallerí