Að minnsta kosti þrír þingmenn Framsóknarflokksins vilja einhvers konar aðgerðir í verðtryggingarmálum áður en samþykkt verður að ganga til kosninga. Slík mál eru þó ekki á forgangslista ríkisstjórnarinnar, sem lagður var fram eftir að ríkisstjórn Sigurðar Inga Jóhannssonar tók við í byrjun apríl.
Sigmundur Davíð Gunnlaugsson, fyrrverandi forsætisráðherra og formaður Framsóknarflokksins, kom inn á þessi mál í viðtölum um síðustu helgi. Afnám verðtryggingar væri eitt þeirra mála sem ætti eftir að leiða til lykta.
Elsa Lára Arnardóttir, þingmaður flokksins, segir að klára þurfi „aðgerðir er varða verðtrygginguna,“ meðal annarra mála. Þegar þessum málum sé lokið sé tímabært að ganga til kosninga. Willum Þór Þórsson tekur í sama streng. „Tíminn til þess að klára mikilvæg mál er mjög knappur mtt kosninga í haust. Ég nefni húsnæðismálin, verðtrygginguna, fæðingarorlofsmál og fjölmörg á borði efnahags- og viðskiptanefndar.“
Mikið rætt um afnám verðtryggingar
Framsóknarflokkurinn ræddi mikið um afnám verðtryggingarinnar í aðdraganda síðustu kosninga. Í pistli fyrir kosningarnar, sem nefndist Framsóknarstjórn eða verðtryggingarstjórn, sagði Sigmundur Davíð meðal annars að staðan væri ekki flókin og ljóst væri að annað hvort yrði ríkisstjórn mynduð um skuldaleiðréttingu, afnám verðtryggingar og heilbrigðara fjármálakerfi, eða ríkisstjórn þeirra sem væru gegn þessum málum.
Í stefnuskrá Framsóknarflokksins fyrir síðustu kosningar var þessi stefna einnig tíunduð. Þar sagði að flokkurinn ætlaði sér að afnema verðtryggingu á neytendalánum. Undir þeim lið sem fjallaði um þá aðgerð sagði m.a.: „Fyrsta skrefið verði að setja þak á hækkun verðtryggingar neytendalána". Slíkt þak hefur ekki verið sett það sem af er kjörtímabilinu.
Í stefnuyfirlýsingu ríkisstjórnar Framsóknarflokks og Sjálfstæðisflokks var þess vegna fjallað nokkuð mikið um verðtryggingu. Þar kom meðal annars fram að leiðrétta ætti verðtryggð lán sem hefðu orðið fyrir verðbólguskoti og að samhliða þeirri skuldaleiðréttingu ætti að „breyta sem flestum verðtryggðum lánum í óverðtryggð“. Ekkert var hins vegar skjalfest þar um afnám verðtryggingar.
Forsætisráðuneytið skipaði þó starfshóp til að undirbúa afnám verðtryggingar skömmu eftir að ríkisstjórnin tók til starfa. Hann komst að þeirri niðurstöðu árið 2014 að það ætti ekki að afnema verðtryggingu.
Bjarni segir að verðtrygging verði alls ekki afnumin
Bjarni Benediktsson fjármála- og efnahagsráðherra hefur sagt opinberlega að það standi alls ekki til að afnema verðtryggingu. Þó hefur verið unnið að frumvarpi um breytingar á verðtryggðum lánum í fjármála- og efnahagsráðuneytinu. Þær breytingar áttu að þrengja að 40 ára jafngreiðslulánum og fara með þau niður í 25 ár. Það frumvarp hefur ekki verið á þingmálaskrá ríkisstjórnarinnar.
