Þing­mönnum í meiri­hluta fjár­laga­nefndar hefur verið hótað vegna skýrslu Vig­dísar Hauks­dótt­ur, „Einka­væð­ing bank­anna hin síð­ar­i“. Þetta kemur fram í bókun meiri­hluta nefnd­ar­innar sem var sam­þykkt á fundi hennar í morg­un. 

Skýrslan er nú aðeins í nafni Vig­dís­ar, og segir Vig­dís við mbl.is að það hafi verið ákveðið vegna þess að hún hafi unnið skýrsl­una að mestu leyti ein þó fjár­laga­nefnd hafi komið að því að kalla eftir upp­lýs­ing­um. Skýrslan var afgreidd úr fjár­laga­nefnd í morg­un, og ákvað hún að vísa skýrsl­unni til stjórn­skip­un­ar- og eft­ir­lits­nefndar með þeirri ósk að þar verði hún tekin til með­ferð­ar. 

„Und­ir­­rit­aðir þing­­menn ít­reka mik­il­vægi þess að stjórn­­­skip­un­­ar- og eft­ir­lits­­nefnd hrindi af stað rann­­sókn og að leynd á gögn­un­um er varða málið verði aflétt. Þing­menn innan stjórn­ar­meiri­hluta fjár­laga­nefndar hafa fengið beinar hót­anir um æru- og eigna­missi frá hátt­settum emb­ætt­is­manni eftir að skýrslan hafði verið kynnt. Kvörtun vegna þess verður sett í við­eig­andi far­veg. Í ljósi þeirra við­bragða telja und­ir­rit­aðir enn frekar mik­il­vægt að rann­sókn fari fram,“ segir í bókun þeirra. 

Vig­dís skrif­aði ekki undir þá bók­un, en það gerðu aðrir full­trúar meiri­hlut­ans, Guð­laugur Þór Þórð­ar­son, Ásmundur Einar Daða­son, Har­aldur Bene­dikts­son, Páll Jóhann Páls­son og Val­gerður Gunn­ars­dótt­ir. 

Val­gerður birtir bók­un­ina á Face­book-­síðu sinni, og segir einnig þar að umræddur emb­ætt­is­mað­ur, sem þing­menn­irnir segja að hafi hótað æru- og eigna­missi, verði nafn­greind­ur.