Tólf mán­aða verð­bólga í þessu mán­uði mælist nú 1,8 pró­sent í stað 0,9 pró­sent í ágúst, en þessa miklu sveiflu upp á við má rekja til mis­taka sem Hag­stofa Íslands gerði við útreikn­ing á vísi­tölu neyslu­verð. 

Í við­tali við mbl.is segir Heiðrún Erika Guð­munds­dótt­ir, deild­ar­stjóri á sviði vísi­talna, að svo virð­ist sem um mann­leg mis­tök hafi verið að ræða, en málið er nú í skoðun inn­an­húss.

Kostn­aður við búsetu í eigin hús­næði (reiknuð húsa­leiga) hækk­aði um 3,3% (áhrif á vísi­tölu 0,51%), verð á fötum og skóm hækk­aði um 4,7% (0,19%) og vörur og þjón­usta tengd tóm­stundum og menn­ingu hækk­uðu um 1,0% (0,11%). Flug­far­gjöld til útlanda lækk­uðu um 16,6% (-0,22%).

„Hækk­unin á reikn­aðri húsa­leigu er að hluta til komin vegna leið­rétt­ing­ar. Í mars 2016 hækk­aði reiknuð húsa­leiga um 0,01%. Þá voru gerð mis­tök sem ollu því að megin verð­breyt­ingin milli febr­úar og mars var ekki tekin með í nið­ur­stöð­urnar fyrr en í apríl 2016. Þannig fór inn eins mán­aðar tíma­töf í útreikn­ing reikn­aðrar húsa­leigu. Tíma­töfin upp­götv­að­ist í sept­em­ber og er leið­rétt með því að taka tveggja mán­aða verð­breyt­ingu inn í nið­ur­stöður sept­em­ber. Raun­hækkun lið­ar­ins milli ágúst og sept­em­ber er 1,5% (0,24%) en hækkun um 1,8% (0,27%) er verð­breyt­ing á milli júlí og ágúst," segir í frétt á vef Hag­stofu Íslands.

Síð­ast­liðna tólf mán­uði hefur vísi­tala neyslu­verðs hækkað um 1,8% en vísi­talan án hús­næðis hefur lækkað um 0,4%.

Mis­tök eins og þessi eru afdrifa­rík fyrir fjár­mála­mark­aði, enda hefur vísi­tala neyslu­verðs mikið vægi nær hvert sem litið er. Verð­tryggð hús­næð­is­lán heim­ila eru tengd henni og vaxta­á­kvarð­anir pen­inga­stefnu­nefndar Seðla­banka Íslands taka mið af 2,5 pró­sent verð­bólgu­mark­miði.

Meg­in­vextir Seðla­banka Íslands eru nú 5,25 pró­sent en þeir væru lækk­aðir um 0,5 pró­sentur á síð­asta vaxta­á­kvarð­ana­fundi.