Raddir heyr­ast um að vöxtur ferða­þjón­ustu sé ekki að skila sér að fullu í hag­vexti á Íslandi né í tekju­aukn­ingu hins opin­bera. Þetta kemur fram í skýrslu starfs­hóps um eignir Íslend­inga á aflands­svæðum og tekju­tap hins opin­bera sem birt var á föstu­dag.

Í skýrsl­unni kemur fram að áætlað tekju­tap rík­is­sjóðs vegna aflands­fé­laga og skattaund­an­skota sé 56 millj­arðar króna á árunum 2006-2014 og að á hverju ári geti við­bót­artap vegna van­tal­inna skatta verið á bil­inu 4,6 til 15,5 millj­arðar króna.

Í skýrsl­unni er rakið nokkuð ítar­lega hvern áætlað tap rík­is­sjóðs vegna skattsvika eða lög­legrar skatta­snið­göngu var á árunum fyrir hrun, þegar hröð fjár­mála­væð­ing og útrás voru helstu ein­kenni hag­þró­unar á Íslandi.

Starfs­hóp­ur­inn skoð­aði hins vegar einnig þá hag­þróun sem átt hefur sér stað eftir hrun, þegar hinn öri vöxtur ferða­þjón­ustu hefur verið alls­ráð­andi. Í skýrsl­unni seg­ir: „Nú þegar heyr­ast raddir um að hann [vöxtur ferða­þjón­ustu] sé ekki að skila sér að fullu í hag­vexti heima fyrir og tekju­aukn­ingu hins opin­bera. Und­ir­strika ber að eng­inn dómur er lagður á þetta hér. Í ljósi reynsl­unnar er hins vegar ágæt og almenn þum­al­fing­urs­regla, að ef ætl­unin er að fyr­ir­byggja tjónið áður en það verður að veru­leika sé best að beina sjónum framar öðru að þeim greinum milli­ríkja­við­skipta þar sem virð­is­auk­inn er mestur og vex hrað­ast hverju sinn­i."

Hátt í 1,8 millj­­ónir ferða­­manna komu til lands­ins í fyrra, eða um 40 pró­­sent fleiri en árið 2015. Í ný­liðnum des­em­ber fóru nærri 125 þús­und erlendir ferða­­menn um Leifs­­stöð, eða 54 þús­undum fleiri en í sama mán­uði árið áður. Aukn­ingin er 76 pró­­sent á milli­ ára á þessum árs­­tíma. Frá árinu 2010 hefur fjöldi ferða­­manna til lands­ins í des­em­ber sexfald­­ast. Það ár komu alls 488 þús­und ferða­menn til lands­ins, eða rúmur fjórð­ungur þess fjölda sem sótti landið heim á árinu 2016.

Hægt er að lesa frétta­skýr­ingu Kjarn­ans um helstu nið­ur­stöður í skýrslu starfs­hóps­ins hér.