Þingnefnd njósnamála á Bandaríkjaþingi hefur stefnt fyrrverandi þjóðaröryggisráðgjafanum Michael Flynn á fund nefndarinnar. Ástæðan er sú að Flynn hefur neitað að afhenda gögn sem nefndin telur nauðsynlegt að fá afhent, til að geta glöggvað sig sambandi rússneskra stjórnvalda við Flynn og fleiri einstaklinga sem voru í baklandi Donalds Trump í kosningabaráttunni í fyrra.
Fram hefur komið að James Comey, sem Trump rak úr embætti yfirmanns alríkislögreglunnar FBI í gær eftir að hafa fengið áskorun um það frá Jeff Sessions dómsmálaráðherra, hafði óskað eftir frekari fjárstuðningi vegna rannsóknar FBI á tengslum framboðs Trumps við Rússa, skömmu áður en hann var rekinn. Það var Jeff Sessions dómsmálaráðherra sem óskaði eftir því að hann yrði rekinn, en Sessions sjálfur er til rannsóknar vegna tengsla hans við Rússa.
Öldungadeildarþingmaðurinn Richard Burr, formaður nefndarinnar, gaf út yfirlýsingu þessa efnis í gærkvöldi, þar sem fram kemur að leitað sé gagna sem tengjast rannsókn nefndarinnar á tengslum forsetaframboðs Trumps Bandaríkjaforseta við Rússa.
Nefndin krafðist gagnanna í bréfi sem hún sendi Flynn þann 28. apríl, en Burr segir lögmann Flynn hafa neitað að verða við beiðninni.
Flynn sagði af sér 13. febrúar, eftir að hafa fengið skipun um að gera það frá Donald Trump forseta og Mike Pence varaforseta. Ástæðan var sú að hann hafði ekki greint þeim frá því að hann hefði rætt um viðskiptaþvinganir gagnvart Rússum við Sergey Kislyak, sendiherra Rússlands í Washington DC.
Kislyak var einnig í sambandi við Jeff Sessions, dómsmálaráðherra Bandaríkjanna, og hitti hann meðal annars í tvígang á fundum fyrir kosningarnar í nóvember. Sessions laug því samt að þingnefnd, eiðsvarinn, að hann hefði ekki verið í neinu sambandi við Rússa í aðdraganda kosninga, en gögn frá leyniþjónustunni CIA og alríkislögreglunni FBI staðfestu að það hefði ekki verið rétt hjá honum.
Tímalína atburðanna, sem staðfestir hafa verið, sem tengjast Sessions og Flynn, er þessi.
- Hinn 28. febrúar í fyrra var Sessions fyrsti þingmaður Repúblikana til að lýsa formlega yfir stuðningi við framboð Donalds Trumps.
- Hinn 3. mars greindi Trump frá því að Sessions yrði aðalráðgjafi hans í öryggis- og varnarmálum í framboðinu.
- Orðrómur um að tölvuárásir hafi átt sér stað á Demókrataflokkinn og helstu stjórnendur framboðs Hillary Clinton er staðfestur með yfirlýsingu 14. júní frá Demókrötum.
- Hinn 18. júlí hittir Sessions sendiherra Rússa, Sergey I. Kislyak, á fundi, eftir fund Repúblikana.
- Fjórum dögum síðar, 22. júlí, eru tölvupóstar kosningastjóra Demókrata og Hillary Clinton, ásamt fleirum, birtir á vef Wikileaks.
- Hinn 25. júlí lýsir bandaríska alríkislögreglan því yfir að rannsókn sé hafin á tölvuárásunum. Sama dag segir Donald Trump í beinni útsendingu, í ræðu. „Rússar, ef þið eruð að hlusta, ég vona að þið getið birt eitthvað af þessum 30 þúsund tölvupóstum sem Hillary eyddi”.
- Hinn 8. september hitti Sessions sendiherrann aftur, að þessu sinni á skrifstofu sinni í Washington D.C. Mánuði síðar lýsir Barack Obama, Bandaríkjaforseti, því fyrir að Rússar séu að skipta sér af lýðræðislegum framgangi kosninga í Bandaríkjunum. Donald Trump er síðan kosinn Bandaríkjaforseti, 8. nóvember.
- Hinn 29. desember bregst Obama við tölvuárásum Rússa með refsiaðgerðum og vísar rússneskum erindrekum úr landi.
- Á svipuðum tíma ræddi Michael Flynn við Kislyak í síma, og þar voru meðal annars viðskiptaþvinganir gagnvart Rússum til umfjöllunar. Símtalið var hlerað.
- Hinn 10. janúar á þessu ári var Sessions í þinginu í Bandaríkjunum, og svaraði spurningum eiðsvarinn. Hann sagðist aldrei hafa verið í samskiptum við Rússa.
- Sessions er skipaður dómsmálaráðherra 8. febrúar.
- Flynn segir af sér 13. febrúar.
- Washington Post greinir frá því 1. mars að Sessions hefði átt fundina með sendiherra Rússa, þvert á það sem hann hafði áður haldið fram. Donald Trump lýsir strax yfir stuðningi við Sessions og segir um nornaveiðar að ræða. Hann hafi ekkert rangt gert.
