Nið­ur­stöður verð­bólgu­vænt­inga könn­unar Seðla­banka Íslands gefa til kynna að verð­bólgu­vænt­ingar á mark­aði til skemmri og lengri tíma hafi lækkað lít­il­lega miðað við síð­ustu könnun bank­ans sem fram­kvæmd var í febr­ú­ar. 

Könnun var fram­kvæmd dag­ana 2. til 4. maí. Leitað var til 30 mark­aðs­að­ila á skulda­bréfa­mark­aði, þ.e. banka, líf­eyr­is­sjóða, verð­bréfa- og fjár­fest­ing­ar­sjóða, verð­bréfa­miðl­ana og fyr­ir­tækja með starfs­leyfi til eigna­stýr­ing­ar. Svör feng­ust frá 22 aðilum og var svar­hlut­fallið því 73%. 

Verð­bólga mælist nú 1,9 pró­sent og er meg­in­vextir Seðla­bank­ans 5 pró­sent. Verð­bólgu­mark­mið Seðla­banka Íslands er 2,5 pró­sent en verð­bólga hefur hald­ist undir því í meira en þrjú ár. Næsti vaxta­á­kvörð­un­ar­dagur er 17. maí næst­kom­andi.

Miðað við mið­gildi svara í könn­un­inni vænta mark­aðs­að­ilar um 1,9-2,0% verð­bólgu á þessu ári en að hún muni aukast á fyrri helm­ingi næsta árs og verði 2,2-2,4%. „Þá vænta mark­aðs­að­ilar þess að verð­bólga verði 2,6% eftir tvö ár og einnig að með­al­tali næstu fimm og tíu ár. Á heild­ina litið lækka verð­bólgu­vænt­ingar um 0,1-0,3 pró­sentur milli kann­ana. Þá gefur könn­unin til kynna að mark­aðs­að­ilar vænti þess að gengi evru gagn­vart krónu verði 111 kr. eftir eitt ár, þ.e. að gengi krónu verði rúm­lega 5% hærra en það var við fram­kvæmd könn­un­ar­innar nú í maí. Er það meiri hækkun en þeir gerðu ráð fyrir í febr­ú­ar,“ segir í til­kynn­ingu Seðla­banka Íslands.

Miðað við mið­gildi svara í könn­un­inni vænta mark­aðs­að­ilar þess að vextir bank­ans verði lækk­aðir um 0,25 pró­sentur á öðrum fjórð­ungi þessa árs. Það sam­svarar því að meg­in­vextir bank­ans lækki úr 5% í 4,75%. Þeir vænta enn frek­ari lækk­unar á fjórða árs­fjórð­ungi en gera hins vegar ráð fyrir því að meg­in­vext­irnir verði hækk­aðir á ný í 4,75% á öðrum fjórð­ungi 2018. Þetta eru lægri vextir en þeir væntu í febr­ú­ar­könn­un­inni.

Þegar könn­unin var fram­kvæmd töldu um 43% svar­enda taum­hald pen­inga­stefn­unnar vera hæfi­legt sem er um 2 pró­sentum hærra hlut­fall en í síð­ustu könn­un. Hlut­fall þeirra sem töldu taum­haldið of þétt eða alltof þétt hækk­aði um 4 pró­sentur og var 57%. Eng­inn þátt­tak­andi taldi taum­haldið of laust eða alltof laust.

Í könn­un­inni voru aðilar spurðir hvort þeir teldu að hús­næð­is­verð muni hækka hrað­ar, jafn­hratt eða hægar á næst­unni en það hefur gert und­an­farið ár. Um 60 pró­sent svar­enda töldu að árs­hækkun hús­næð­is­verðs verði hæg­ari næsta hálfa árið en í apr­íl, en þá mæld­ist árs­hækk­unin 20 pró­sent. Aðrir töldu að árs­hækk­unin yrði jafn hröð. Hins vegar töldu 95% svar­enda að hægja muni á hækkun hús­næð­is­verðs næsta árið.