Í skýrslu ÖSE, Örygg­is- og sam­vinnu­stofn­unar Evr­ópu, segir að full­trúar Sjálf­stæð­is­flokks­ins, hafi kvartað yfir hlut­drægni fjöl­miðla á fundi með eft­ir­lits­mönnum stofn­un­ar­innar í aðdrag­anda Alþing­is­kosn­inga í lok októ­ber í fyrra. 

Í skýrsl­unni, sem birt hefur verið á vefnum og vitnað var til í umfjöllun RÚV, segir að full­trú­arnir hafi kvartað undan hlut­drægni fjöl­miðla sem fjöll­uðu um „lög­bann­ið, þannig að það hafi ein­gögnu átt við um umfjöllun um for­sæt­is­ráð­herrann,“ sem á þessum tíma var Bjarni Bene­dikts­son, for­maður Sjálf­stæð­is­flokks­ins.

Lög­bannið sem vitnað er til, var lög­bannið sem Glitnir Holdco fékk sett á umfjöllun Stund­ar­innar og Reykja­vík Media upp úr gögnum frá Glitni. Meðal ann­ars var þar umfjöllun um við­skipta­mála­efni Bjarna, þegar hann var bæði stór þátt­tak­andi í íslensku við­skipta­lífi og þing­maður fyrir Sjálf­stæð­is­flokk­inn.

Lög­bannið var sett á eftir að sýslu­maður sam­þykkti beiðni Glitnis Holdco þar um, um miðjan októ­ber. 

Lög­bannið hefur nú verið dæmt ólög­legt í hér­aði, en Glitnir hefur áfrýjað til Hæsta­rétt­ar, og því gætir áhrifa þess enn. Rit­stjórar Stund­ar­innar og Reykja­vík Media hafa harð­lega mót­mælt lög­bann­inu alla tíð, og sagt það vega að tján­ing­ar­frels­inu og frjálsri fjöl­miðlun á Íslandi.