Nem­endum í 9. bekk gefst kostur á að þreyta að nýju könn­un­ar­próf í ensku og íslensku, en margir þeirra tóku próf við óvið­un­andi aðstæður í lið­inni viku. Þátt­taka í könn­un­ar­próf­unum verður val­kvæð, sam­kvæmt ákvörðun Lilju Alfreðs­dótt­ur, mennta- og menn­ing­ar­mála­ráð­herra. Stjórn­endur í hverjum skóla ákveða hvort þeir leggja prófin fyrir nem­endur sína í vor eða haust, að því er segir í til­kynn­ingu frá mennta- og menn­ing­ar­mála­ráðu­neyt­in­u. 

„Þeir nem­endur sem luku próf­unum í lið­inni viku fá afhentar nið­ur­stöður úr þeim. Öllum býðst svo að þreyta sam­bæri­leg könn­un­ar­próf að nýju, enda er það lög­bundin skylda mennta­mála­yf­ir­valda að bjóða nem­endum mat á náms­stöðu sinni. Þeir nem­endur sem kjósa, að höfðu sam­ráði við for­ráða­menn, að taka ekki umrædd próf aftur verða leystir undan próf­skyldu. Þessi leið var valin þar sem hún er talin sann­gjörn­ust fyrir nem­end­ur. Grunn­skóla­lög heim­ila und­an­þágu frá próf­skyldu sam­ræmdra prófa, ef gildar ástæður eru til stað­ar. Þær eru til­greindar í reglu­gerð, sem nauð­syn­legt er að breyta svo þær aðstæður sem nú eru uppi telj­ist gild­ar. Vinna við reglu­gerð­ar­breyt­ing­una er þegar haf­in,“ segir í til­kynn­ingu frá ráðu­neyt­inu.

Lilja Alfreðs­dótt­ir, mennta- og menn­ing­ar­mála­ráð­herra, segir í til­kynn­ingu að mik­il­vægt hafi verið að eyða óvissu um fram­hald máls­ins, og virð­ing sé borin fyrir skoð­unum nem­enda, kenn­ara og for­eldra. „Skoð­anir nem­enda, for­eldra, kenn­ara og skóla­stjórn­enda eru ólíkar og ég hef t.a.m. fengið fjöl­mörg bréf frá fólki sem ýmist vill fella prófin nið­ur, leggja þau fyrir alla nem­endur að nýju eða fara bil beggja. Það er ljóst að engin ein nið­ur­staða sættir öll sjón­ar­mið í mál­inu en það er mik­il­vægt að ákvörðun ráðu­neyt­is­ins sé í fullu sam­ræmi við lög og sann­gjörn gagn­vart nem­end­um. Réttur nem­enda verður ekki tek­inn af þeim og ég er von­góð um að sátt geti skap­ast um þessa leið,“ segir Lilja.

Á fundi sem ráð­herra hélt í morgun með lyk­il­að­ilum úr skóla­sam­fé­lag­inu komu fram ólík sjón­ar­mið. Skoðun sumra var að ógilda ætti prófin þetta árið og ekki afhenda nem­endum nið­ur­stöður þeirra, segir í til­kynn­ingu. Þrátt fyrir ólík sjón­ar­mið sam­mælt­ust fund­ar­menn um að vinna að far­sælli lausn í kjöl­far ákvörð­unar ráð­herra. 

„Fund­ar­menn voru einnig sam­mála um að gera nauð­syn­legar breyt­ingar á reglu­gerð, svo nið­ur­stöður úr sam­ræmdum könn­un­ar­prófum verði ekki not­aðar við mat á umsóknum nem­enda um fram­halds­skóla­vist að loknu grunn­skóla­námi. Nið­ur­stöð­unum er því ætlað að gefa nem­endum sjálfum vís­bend­ingu um eigin náms­stöðu, svo þeir geti nýtt sem best síð­asta ár sitt í grunn­skóla til að auka hæfni sína í til­teknum grein­um,“ segir í til­kynn­ing­unni.