Gylfi Zoega, pró­fessor í hag­fræði og nefnd­ar­maður í pen­inga­stefnu­nefnd Seðla­banka Íslands, segir að vernd­ar­toll­arnir sem Don­ald Trump Banda­ríkja­for­seti talar nú sem mest fyr­ir, gætu hjálpað honum að ná end­ur­kjöri. 

Þeir geti hjálpað þeim svæðum í Banda­ríkj­unum þar sem iðn­aður hefur farið hnign­andi und­an­farna ára­tugi, en þó ein­ungis til skamms tíma. 

Betri leið til að bæta þeim hópum upp fyrir tjónið sem alþjóða­vædd við­skipti hafa haft í för með sér, væri að efla menntun þeirra. 

Þetta er meðal þess sem kemur fram í ítar­legri grein Gylfa í Vís­bend­ingu, sem kemur til áskrif­enda á föstu­dag­inn, en Gylfi er fastur penni í rit­inu og skrifar í það ítar­legar greinar tvisvar sinnum í mán­uði.

Í grein­inni fjallar hann um vernd­ar­tolla í hag­sögu­legu sam­hengi, en fyr­ir­sögn hennar er; Um fars og harm­leiki.

„Vernd­ar­tollar bæta hag sumra inn­lendra atvinnu­greina á kostnað ann­arra sem þá verða fyrir barð­inu á hærri tollum ann­arra ríkja. Unnt er að nota tolla á fyrstu stigum hag­þró­unar til þess að vernda litlar en vax­andi atvinnu­greinar (e. infant industry argu­ment) en þegar til lengri tíma er litið þá draga tollar úr hag­kvæmni sér­hæf­ingar og milli­ríkja­við­skipta, nokkuð sem hefur verið þekkt allar götur frá því David Ricardo setti fram hug­myndir sínar um hlut­falls­lega yfir­burði.  Vernd­ar­tollar kreppu­ár­ana á fjórða ára­tug­inum urðu þannig til þess að draga úr umfangi utan­rík­is­við­skipta og minnka vel­ferð. Þannig hefur verið reiknað út að alþjóða­við­skipti hafi dreg­ist saman um 8% vegna tolla­hækk­ana og um 6% vegna ann­arra við­skipta­hind­r­ana á þeim ára­tugi.

Það sem tollar Banda­ríkj­anna munu vænt­an­lega gera er að bæta hag eig­enda fyr­ir­tækja í stál- og áliðn­aði og mögu­lega fjölga störfum þar en á móti verða aðrar greinar fyrir barð­inu á vernd­ar­tollum við­skipta­land­anna, t.d. land­bún­að­ur. Það er kannski ekki til­viljun að Trump naut mik­ils stuðn­ings kjós­enda í þeim borgum þar sem iðn­aður hafði þrif­ist en dreg­ist saman á liðnum ára­tug­um. Þannig geta vernd­ar­toll­arnir hjálpað honum að ná end­ur­kjöri.

Nú er ljóst að starfs­fólk í ýmsum atvinnu­grein­um, t.d. Banda­rískum iðn­aði, hefur tapað á alþjóða­við­skiptum á meðan aðr­ir, t.d. þeir sem starfa í fjár­mála­stofn­un­um, hafa hagn­ast. En betri leið til þess að bæta hinum fyrr­nefndu upp tjónið væri að efla menntun þeirra ein­stak­linga sem ganga með skarðan hlut af borði og barna þeirra svo að þeir geti nýtt krafta sína í öðrum atvinnu­grein­um. Þau mis­tök að bregð­ast ekki við fátækt í gömlu iðn­að­ar­hér­uð­unum er ein ástæða vin­sælda og kosn­ingar Don­alds Trump í emb­ætti for­seta,“ segir meðal ann­ars í grein Gylfa.

Hægt er að ger­ast áskrif­andi að Vís­bend­ingu hér.