Dagur B. Egg­erts­son borg­ar­stjóri greind­ist með fylgi­gigt nú á dög­un­um. Hann seg­ist geta búist við því að vera í sterkri lyfja­með­ferð í allt að tvö ár. Þetta kemur fram í ítar­legu við­tali Frétta­blaðs­ins við Dag í morg­un. 

Í við­tal­inu segir Dagur gigt­ina hafa komið í kjöl­far sýk­inga sem hann fékk í kvið­ar­holið síð­asta haust, en hann hafi byrjað að finna fyrir ein­kennum eftir að hafa meiðst fyrir mán­uði síð­an. Þá meidd­ist Dagur á fæti eftir að hafa rekið rist­ina sína í rör, en í kjöl­farið komu upp bólgur ann­ars staðar á lík­am­anum og var hann greindur með fylgi­gigt.

Sam­kvæmt Degi flakkar gigtin milli liða og getur lagst á ýmis líf­færi. Hann sé búinn að vera í miklum rann­sóknum og með­höndlun eftir grein­ingu og seg­ist sjálfur vera kom­inn í „fall­byssu­með­ferð“ til að reyna að slá hana nið­ur. Aðspurður segir hann þessa teg­und af sjúk­dómnum geta læknast, en ákveð­inn hluti þeirra sem fá þetta sé með þetta krónískt.

Hins vegar segir Dagur sjúk­dóm­inn ekki vera lífs­hót­andi, þótt hann sé hvim­leiður og honum geti fylgt bólgur og auð­vitað verkir og hreyfiskerð­ing. Hann sé á sterkum lyfjum og segir mögu­legt að munu ná stjórn á ein­kenn­unum á ein­hverjum mán­uð­um. „En ég get alveg búist við því að þurfa að vera á þessum sterku lyfjum í að minnsta kosti eitt og hálft eða tvö ár,“ segir borg­ar­stjór­inn.