Origo, áður Nýherji, hefur skrifað undir kaupsamning við félagið Diversis um sölu á 55 prósent hlut í dótturfélaginu Tempo fyrir 34,5 milljónir Bandaríkjadala, eða sem nemur um 4,3 milljörðum króna. Heildarverðmiðinn á Tempo í þessum viðskiptum er því 62,5 milljónir Bandaríkjadala eða um 7,7 milljarðar króna miðað við núverandi gengi krónu gagnvart Bandaríkjadal.
Í tilkynningu til kauphallar segir Finnur Oddsson forstjóri að þetta séu ánægjuleg tíðindi fyrir Origo og Tempo, en bókfærður söluhagnaður Origo er um þrír milljarðar króna og sá eignarhlutur sem félagið á í Tempo núna hækkar um tvo milljarða í bókum félagsins.
Bæði Origo og Diversis munu leggja til tvær milljónir Bandaríkjadala í viðbótarhlutafé til að styðja við frekari vöxt félagsins. „Í þessari sölu á ríflega helmingshluta Tempo felst viðurkenning á frábæru starfi starfsfólks Tempo og Origo síðustu ár. Um leið eru verðmæti íslensks hugvits staðfest áþreifanlega, en síðustu misseri hefur slíkt þróunarstarf fengið aukna athygli og stuðning stjórnvalda, sem er vel. Tempo hefur gengið vel undanfarin ár, vaxið hratt og stendur nú styrkum fótum. Árstekjur félagsins nema ríflega USD 20 milljónum og viðskiptavinir eru ríflega 12.000 í yfir 120 löndum, þjónað af 100 manna samhentum hópi starfsfólks í Reykjavík og Montreal. Við fögnum því sérstaklega að fá Diversis til samstarfs um að gera veg og vanda Tempo enn meiri, en sérþekking þeirra á sviði tækni, hugbúnaðarþróunar og markaðssetningar mun nýtast til að styrkja vöruþróun og efla enn frekar tekjuvöxt á næstu árum. Með stuðningi Diversis og Origo gerum við ráð fyrir að nú fari í hönd nýr kafli þróunar og tekjuvaxtar hjá Tempo og að virði félagsins geti aukist verulega á næstu misserum. Við höfum því lagt sérstaka áherslu á að Origo haldi áfram verulegum eignarhlut í félaginu og teljum það reyndar eitt af mikilvægari hagsmunamálum hluthafa Origo," er haft eftir Finni í fréttatilkynningu.
