Fulltrúar Sjálfstæðisflokks í borgarstjórn telja mikilvægt að staðið verði við að fjölga leikskólarýmum enda stefnt að því að tryggja 12 mánaða börnum rými.
Í tilkynningu frá Sjálfstæðisflokknum í Reykjavík segir Eyþór Arnalds oddviti það hins vegar til lítils að fjölga leikskólarýmum ef leikskólarnir standa ómannaðir.
„Þrátt fyrir fögur fyrirheit allt síðasta kjörtímabili voru biðlistar langir og börn gjarnan send heim vegna manneklu síðasta vetur. Auk þess er verulegur skortur á fagmenntuðu fólki í leikskólum borgarinnar. Það er því sá raunveruleiki sem þarf að hafa í huga við framkvæmdina. Eins mætti víkka sjóndeildarhringinn og leggja aukna áherslu á ráðningu starfsfólks með fjölbreyttan bakgrunn sem gæti reynst þroskandi fyrir börnin, t.d. með bakgrunn í tónlist, íþróttum eða listum,“ segir Eyþór í tilkynningu.
Leikskólarýmum verður fjölgað um allt að 750 á næstu fimm árum til að hægt verði að bjóða öllum börnum tólf mánaða og eldri pláss á leikskóla fyrir lok árs 2023, en meirihlutinn í Reykavík kynnti þessi áform í gær.
„Á næstu fimm árum verða byggðir fimm nýir leikskólar og reistar verða a.m.k. fimm viðbyggingar við leikskóla þar sem er mikil eftirspurn. Einnig verða opnaðar nýjar leikskóladeildir í færanlegu húsnæði við fjóra leikskóla strax á næsta ári. Settar verða á fót sérútbúnar ungbarnadeildir við alla borgarrekna leikskóla sem hafa fjórar deildir eða fleiri. Það á við um 46 leikskóla og stefnt er að því að þeir verði allir búnir sérstakri ungbarnadeild fyrir árslok 2023,“ segir í tilkynningu borgarinnar.
Eyþór bendir í tilkynningu Sjálfstæðismanna jafnframt á að fimm ára fjárhagsáætlun frá síðasta ári hafi verið verulega vanáætluð, og því gangi áform meirihlutans ekki upp.
„Ekki er hægt að láta hjá líða að nefna að foreldrar sumra barna á leikskólaaldri eru ekki að fá leikskólarými fyrir börn sín í þeim hverfum þar sem þau eru búsett. Það eitt og sér er áhyggjuefni hjá foreldrum barnanna enda getur slík staða haft áhrif á félagsleg tengsl barnanna í hverfinu. Það er ekki nóg að gera ráð fyrir steinsteypu til að brúa bilið. Það þarf að vinna markvisst að því að tryggja faglega mönnun sem of lengi hefur verið í ólestri,“ segir hann.
