Það segir sitt um átökin sem ein­kenna umræðu um pen­inga­stefn­una í land­inu og ákvörðun vaxta á hverjum tíma, að nú er umræðan um að árið 2007 sé að koma aftur orðin sprell­lif­andi. Þetta var eitt af því sem var til umræðu á kynn­ing­ar­fundi Pen­inga­stefnu­nefndar Seðla­banka Íslands í gær, vegna þeirrar ákvörð­unar að hækka stýri­vexti um 0,5 pró­sentu­stig, upp í 5,5 pró­sent.

Ingólfur Bend­er, for­stöðu­maður grein­ing­ar­deildar Íslands­banka, spurði Má Guð­munds­son seðla­banka­stjóra hvort nú væri að teikn­ast upp staða þar sem gæti orðið mikið inn­flæði af fjár­magni, gengið myndi styrkjast, og ójafn­vægi skap­ast í þjóð­ar­bú­skapn­um. Már sagði allt aðrar aðstæður vera uppi nú og að Seðla­bank­inn hefði tekið mark­aðs­öflin að veru­legu leyti úr sam­bandi, og væri ekki að leyfa krón­unni að styrkj­ast. Það væri gert meðal ann­ars til þess að búa í hag­inn fyrir útboðin sem eru liður í losun fjár­magns­hafta.

Eins og fram kom á kynn­ing­ar­fundi í Hörpu­nni, þegar los­un­ar­á­ætl­unin var kynnt, þá er stefnan til fram­tíðar litið að gengi krón­unnar ráð­ist af raun­hag­kerf­inu, inn­flæði og útflæði fjár­magns.

Spurn­ing sem vaknar nú, og er eðli­leg pæl­ing í ljósi þeirra tíð­inda sem framundan eru þegar kemur að afnámi haft, er hvernig gengi krón­unnar mun þró­ast í þessum ólgu­sjó sem framundan er. Er gengi krón­unn­ar að fara styrkj­ast veru­lega eða verður gengið stillt af á mátu­legum stað fyrir útflutn­ings­hlið hag­kerf­is­ins? Hvernig sem fer, þá er lík­lega best að vona að árið 2007 sé ekki að fara koma aft­ur...