Arion banki sagði í dag upp 20 starfs­mönnum og til­kynnti að afgreiðslu bank­ans á Hólma­vík verði lokað . Áður hafði starfs­fólki bank­ans verið fækkað um 120 frá lokum árs 2009 auk þess sem Arion banki hafði þegar lokað 16 úti­búum á því tíma­bili. Þetta kemur fram í til­kynn­ingu frá Arion banka.

Þar segir að starfs­fólki hafi verið fækkað um 120 frá árs­lokum 2009, og að fækk­unin hafi að mestu náðst fram í gegnum starfs­manna­veltu með þeim hætti að ekki var ráðið aftur í störf sem losna. Bank­inn hefur hins vegar líka ráð­ist í stór­felldar upp­sagnir á þessu tíma­bili. Í sept­em­ber 2011 var til að mynda 57 starfs­mönnum sagt upp störf­um. 

 Í til­kynn­ing­unni segir enn frem­ur:

„Í dag var ráð­ist í frek­ari hag­ræð­ing­ar­að­gerðir innan Arion banka þegar 18 starfs­mönnum var sagt upp störf­um. Það er erfitt skref að þurfa að grípa til upp­sagna en nauð­syn­legt til að auka skil­virkni og hag­kvæmni í grunn­rekstri bank­ans. Að auki verður afgreiðslu Arion banka á Hólma­vík lokað en við það munu tveir starfs­menn til við­bótar láta af störf­um.

Eftir lokun afgreiðsl­unnar á Hólma­vík starf­rækir Arion banki 23 útibú og afgreiðslur um land allt. Við­skipta­vinir afgreiðsl­unnar á Hólma­vík geta sótt þjón­ustu í útibú bank­ans í Borg­ar­nesi eða hvert það útibú bank­ans sem þeir kjósa, en um helm­ingur við­skipta­vina afgreiðsl­unnar á Hólma­vík er með búsetu á höf­uð­borg­ar­svæð­inu.“