Hæstu launagreiðslur til nefndarmanna í rannsóknarnefnd um aðdraganda og orsakir fyrir falli sparisjóðanna fóru til Bjarna Frímanns Karlssonar. Hann fékk samtals ríflega 39,1 milljón króna á starfstíma nefndarinnar, sem stóð yfir frá 1. september 2011 og fram að því að skýrsla nefndarinnar var kynnt, 10. apríl 2014.
Þetta kemur fram í svari forseta Alþingis við fyrirspurn Karls Garðarssonar, þingmanns Framsóknarflokksins. Karl spurði ítarlega út í kostnað við vinnu rannsóknarnefnda á vegum Alþingis um hrun bankanna, Íbúðalánasjóð og fall sparisjóðanna.
Sigríður Ingvarsdóttir, héraðsdómari, starfaði sem formaður nefndarinnar til 20. september 2012 en Hrannar Már S. Hafberg tók við formennsku í nefndinni 1. október 2012 og gegndi henni þar til störfum nefndarinnar lauk. Þau Sigríður, Hrannar, Tinna Finnbogadóttir og Bjarni Frímann Karlsson voru í fullu starfi fyrir nefndina. Greiðslur til nefndarmanna á starfstíma þeirra voru annars vegar 16,1 milljón króna til Sigríðar Ingvarsdóttur í 13 mánuði til 20. september 2012 og 24,1 milljón króna til Hrannars í 19 mánuði frá 1. október 2012 og hins vegar 38,2 milljónir króna til Tinnu í 32 mánuði, og 39.1 milljón króna til Bjarna Frímanns í 32 mánuði, eins og áður sagði.