Björg­un­ar­sveitir eru nú að störfum víða á Suð­ur- og Suð­vest­ur­landi. Þetta kemur fram í frétt á heima­síðu Lands­bjargar. Þar segir að í kringum hádegið hafi fyrstu beiðn­irnar um aðstoð vegna óveð­urs­ins borist, í Vest­manna­eyjum og Grinda­vík. Síðan þá hafa björg­un­ar­sveitir á Suð­ur­nesjum, Hellu, Árborg, Vogum og höf­uð­borg­ar­svæð­inu verið kall­aðar út.

Verk­efni björg­un­ar­sveit­anna eru af ýmsum t0ga, meðal ann­ars vegna lausra þak­platna og klæðn­inga, fjúk­andi girð­inga og sorp­t­unna, og þá hafa gluggar brotn­að. Þá hafa björg­un­ar­sveit­ar­menn þurft að sinna útköllum þar sem fjúk­andi trampólín koma við sögu, þrátt fyrir fjölda við­var­anna um að fólk hugi sér­stak­lega að því að festa þau nið­ur.

Bless­un­ar­lega hafa engin stór atvik komið upp, að því er fram kemur í frétt Lands­bjarg­ar.

Flestar aðstoð­ar­beiðn­irnar hafa komið á höf­uð­borg­ar­svæð­inu, þar sem hátt í 60 björg­un­ar­sveit­ar­menn eru að störf­um, og á Suð­ur­nesjum þar sem 30 björg­un­ar­sveit­ar­menn sinna hjálp­ar­beiðn­um.

Þá kemur fram í frétt hjá mbl.is að tölu­verð röskun hafi orðið á milli­landa­flugi frá Kefla­vík­ur­flug­velli í dag vegna veð­urs­ins. En nú þegar hefur flugum Icelandair til og frá London, Ósló og Stokk­hólmi verið aflýst, sem og leiguflug­i flug­fé­lags­ins til Vín­ar­borg­ar.

Að sögn Guð­jóns Arn­gríms­son­ar, upp­lýs­inga­full­trúa Icelanda­ir, eru um fimmtán hund­ruð flug­far­þegar í vand­ræðum vegna þessa, bæði hér á landi og erlend­is. Þá hafa sömu­leiðis orðið seink­anir á fjölda fluga hjá Icelanda­ir.

WOW air hefur sömu­leiðis fellt niður flug sem átti að fara til Lund­úna og Berlínar í dag, en vél félags­ins frá Kaup­manna­höfn gat ekki lent í Kefla­vík og var því snúið til Akur­eyrar þar sem hún lenti heilu og höldnu í dag.

Þá hefur öllu inn­an­lands­flugi sömu­leiðis verið aflýst.