Um klukku­tíma áður en til stóð að loka útvarps­stöð­inni Radio Iceland, í eigu Adolfs Inga Erlings­son­ar, var gengið frá sam­komu­lagi við fjár­festi em tryggir áfram­hald­andi rekstur stöðv­ar­inn­ar. Að minnsta kosti um sinn. Frá þessu er greint á Vísi.

Radio Iceland til­kynnti í stöðu­upp­færslu á Face­book að stöðin myndi hætta starf­semi á mið­nætti í gær nema að krafta­verk myndi ger­ast. Þar sagði að ­starfs­fólk hafi gefið sig allt í að reyna að halda stöð­inni gang­andi svo að fólk í útlönd­um, ferða­menn á Íslandi og fólk sem hér býr en talar ekki íslensku gæti fylgst með því sem ger­ist á Íslandi. Það hafi ekki geng­ið, inn­koman hafi ekki dugað fyrir útgjöldum og styrkt­ar­að­ilum hafi fjölgað of hægt.

Útvarps­stöðin fór í loftið á hádegi þann 16. febr­úar síð­ast­lið­inn og hleypti Ragn­heiður Elín Árna­dótt­ir, iðn­að­ar- og við­skipta­ráð­herra, stöð­inni form­lega af stokk­un­um. Allt dag­skrár­efni hefur verið á ensku frá upp­hafi.

Adolf Ingi segir í sam­tali við Vísi að svo virð­ist sem fólk hafi ekki viljað sjá stöð­ina hætta útsend­ingu og fjár­festir hafi feng­ist inn í rekst­ur­inn sem vilji taka þátt í rekstr­in­um. Hann vill ekki greina frá því hver fjár­festir­inn er en segir að um sé að ræða einn margra sem hafi haft sam­band eftir að fréttir um yfir­vof­andi lokun stöðv­ar­innar voru sagð­ar. Adolf Ingi segir enn­fremur að stöðin sé ekki langt frá því að standa undir sér, vanda­málið sé upp­söfnuð skuld frá því að hún byrj­aði útsend­ing­ar.