Vinnu­mála­stofnun áætlar að í lok þessa árs verði 16.900 erlendir rík­is­borg­arar starf­andi á íslenskum vinnu­mark­aði. Gangi spáin eftir verður þetta annar mesti fjöldi starf­andi erlendra rík­is­borg­ara í sög­unni. Árið 2007 voru erlendir rík­is­borg­arar á íslenskum vinnu­mark­aði um 16.300 tals­ins og árið 2008 voru þeir tæp­lega 18.200. Morg­un­blaðið greinir frá spá Vinnu­mála­stofn­unar í dag. Í umfjöllun blaðs­ins segir að styrk­ing krón­unnar og mikil hækkun launa á Íslandi sé meðal þeirra þátta sem geri landið eft­ir­sókn­ar­vert.

Haft er eftir Karli Sig­urðs­syni, sér­fræð­ingi hjá Vinnu­mála­stofn­un, að áætl­unin sé hóf­söm en árs­með­al­tal erlendra starfs­manna verði um 16.700 manns. Vöxtur í ferða­þjón­ustu og bygg­inga­geir­anum muni lík­leg­ast ráða mestu um hver aukn­ingin verður á næstu miss­er­um.

Í sam­an­burði við önnur Evr­ópu­ríki eru með­al­árs­laun í evrum um 31.600 evrur á Íslandi. Launin eru hærri í sjö lönd­um. Í Sví­þjóð, Bret­landi, Hollandi og Dan­mörku eru þau á bil­inu 33 til 34 þús­und evrur á ári, í Lúx­em­borg eru þau um 38 þús­und evr­ur, í Nor­egi eru þau rúm­lega 46 þús­und evrur og í Sviss eru launin að með­al­tali 61,5 þús­und evrur á ári, sam­kvæmt tölum Eurostat og Morg­un­blaðið birtir í dag.

Sam­kvæmt nýj­ustu birt­ingu Hag­stof­unnar hefur atvinnu­leysi minnkað nokkuð milli ára á Íslandi og mæld­ist 3,8 pró­sent í ágúst síð­ast­liðn­um, sam­an­borið við 4,7 pró­sent í ágúst 2014. Gögn Hag­stof­unnar byggja á svo­kall­aðri vinnu­mark­aðs­rann­sókn en skráð atvinnu­leysi í ágúst síð­ast­liðnum hjá Vinnu­mála­stofnun var 2,6 pró­sent.