Samtals sóttu 154 einstaklingar um hæli á Íslandi á tímabilinu frá 1. janúar 2015 til 31. agúst 2015. Það er 66 prósent aukning miðað við sama tímabil í fyrra en þá höfðu 93 sótt um hæli. Í ágúst sóttu 49 manns um hæli á Íslandi en það eru jafnmargir og sóttu um samtals síðustu þrjá mánuðina á undan.
Þetta kemur fram á vef innanríkisráðuneytisins í dag. „Til að setja töluna [49] í samhengi þá sóttu alls 35 manns um hæli á Íslandi árið 2009 og 50 árið 2010, sbr. meðfylgjandi mynd hér að neðan. Heildarfjöldi umsækjenda í ár er varlega áætlaður,“ segir í tilkynningu ráðuneytisins þar sem áætlað er að umsóknir í ár verði um 250 talsins, samanborið við um 170 í fyrra og árið 2013.
Umsækjendur eru af samtals 32 þjóðernum auk þess sem einn umsækjandi er ríkisfangslaus. Albanir eru fjölmennastir og telja 51 umsækjanda, eða tæplega þriðjung umsókna. „Í ljósi borgarastyrjaldarinnar sem geisað hefur í Sýrlandi síðan árið 2011 þarf ekki að undrast að Sýrlendingar eru næstfjölmennasta þjóðernið meðal umsækjenda. Þeir eru átján talsins eða 12% allra umsókna,“ segir í tilkynningunni.
Fram kemur að átta málum Sýrlendinga hafi verið lokið hér á landi með ákvörðun Útlendingastofnunar á árinu. Fjórum var veitt staða flóttamanns og hæli á Íslandi og þrír voru sendir til annars Evrópuríkis á grundvelli Dyflinnarreglugerðarinnar. Í einu máli hafði umsækjandi þegar fengið vernd í Evrópuríki og var honum gert að snúa aftur þangað.
„Í ljósi borgarastyrjaldarinnar í Sýrlandi kemur ekki til greina að vísa Sýrlendingum aftur þangað. Sé hætta á að sýrlenskum umsækjendum sé vísað þangað, verði þeim snúið til annars Evrópuríkis, kemur ekki til greina að senda þá til viðkomandi ríkis.
Leitast er við að leysa hratt og örugglega úr málum Sýrlendinga og borgara annarra ríkja þar sem stríðsátök geisa. Þannig var málum tveggja Sýrlendinga lokið á innan við mánuði í júlí,“ segir á vef ráðuneytisins.
48 veitti hæli eða vernd en 50 synjað
Útlendingastofnun veitti 48 manns hæli eða aðra vernd á tímabilinu frá janaúar til loka ágúst 2015. Fimmtíu var synjað um vernd. „Af þeim málum sem lauk með ákvörðun – þar sem umsækjandi dró umsókn ekki til baka eða lét sig hverfa – var veitt vernd í 35% tilfella. 36% mála lauk með synjun um hæli og ræður hið háa hlutfall umsækjenda frá Balkanskaga miklu þar um. Þá lauk 29% mála með endursendingu til annars öruggs Evrópuríki, ýmist samkvæmt Dyflinnarreglugerðinni eða á grundvelli þess að umsækjandi hafði þegar fengið veitta vernd í viðkomandi ríki.“
