Tæp­lega sex af hverjum tíu Íslend­ingum eru þeirrar skoð­unar að refsa eigi fyrir kaup á vændi og um fjórir af hverjum tíu vilja að sala á vændi sé einnig refsi­verð. Þetta kemur fram í könn­un ­sem unnin var af Félags­vís­inda­stofnun Háskóla Íslands í apríl síð­ast­liðnum og greint er frá í Frétta­blað­inu í dag.

Í Íslandi hefur sænska leiðin svo­kall­aða verið fest í lög, en sam­kvæmt henni er kaup á vændi refsi­vert en sala á því refsi­laus. Mikil umræða hefur verið um málið að und­an­förnu en Kjarn­inn greindi frá því í lok júlí að Amnesty International væru að íhuga að setja sér stefnu um að afglæpa­væða eigi vændi. Það hefði komið fram í drögum um stefnu sem lögð var fyrir heims­þing sam­tak­ana sem fór fram um liðna helgi. Fjöl­margir hafa gagn­rýnt hug­mynd­ina, meðal ann­ars sjö íslensk kvenna­sam­tök og Gunnar Bragi Sveins­son utan­rík­is­ráð­herra.

Alls segja 58 pró­sent aðspurðra í könnun Félags­vís­inda­stofn­unar að þeir telji að kaup á vændi eigi að vera refsi­vert, 24 pró­sent eru á móti því en 18 pró­sent hafa ekki myndað sér skoð­un. Þegar spurty var um hvort sala á vændi ætti að vera refsi­verð svör­uðu 38 pró­sent já, 34 pró­sent nei en 28 pró­sent hvorki né.

Mik­ill kynja­munur var á svörum í könn­un­inni. Tæp­lega fimm af hverjum tíu konum (46 pró­sent) kvenna vilja að hægt sé að refsa fyrir sölu á vændi á meðan þrír af hverjum tíu körlum hafa þá skoð­un. Þá segj­ast 78 pró­sent kvenna vera fylgj­andi því að kaup á vændi séu refsi­verð en 39 pró­sent karla eru þeirrar skoð­un­ar.

Úrtak könn­un­ar­innar var 1.200 manns og svar­hlut­fall var sex­tíu pró­sent.