Körfu­bolta­kapp­inn Jón Arnór Stef­áns­son var í kvöld val­inn íþrótta­maður árs­ins 2014 af Sam­tökum íþrótta­f­rétta­manna. Verð­launa­af­hend­ingin fór fram í kvöld og var í beinni útsend­ingu á RÚV, en þetta var í 59. sinn sem sam­tökin útnefna íþrótta­mann árs­ins.

Jón Arnór var ekki við­staddur verð­launa­af­hend­ing­una í kvöld, en hann er á Spáni þar sem hann leikur með körfu­boltalið­inu Unicaja Málaga í spænsku úrvals­deild­inni. Hann átti stóran þátt í því að tryggja þátt­töku­rétt íslenska karla­lands­liðs­ins í körfu­bolta á loka­keppni EM í fyrsta skipti, en mótið fer fram síðar á þessu ári.

Þetta var í níunda skiptið að Jón Arnór var á meðal þeirra tíu íþrótta­manna sem komu til álita til að hreppa verð­laun­in. Jón Arnór er bróðir Ólafs Stef­áns­sonar hand­bolta­manns, en þeir eru fyrstu bræð­urnir til að vera útnefndir íþrótta­menn árs­ins. Þá hefur aðeins einn körfu­bolta­maður verið val­inn íþrótta­maður árs­ins á undan Jóni Arn­óri, en það var fyrir 48 árum þegar Kol­beinn Páls­son hlaut tit­il­inn.

Þá var íslenska karla­lands­liðið í körfu­bolta útnefnt lið árs­ins, Rúnar Páll Sig­munds­son þjálf­ari Íslands­meist­ara Stjörn­unnar í fót­bolta karla hlaut tit­il­inn þjálf­ari árs­ins. Þá voru þeir Ásgeir Sig­ur­vins­son fót­bolta­maður og Pétur Guð­munds­son körfu­bolta­maður teknir inn í frægð­ar­höll ÍSÍ við hátíð­lega athöfn í kvöld.