Lægstu laun hækka upp í 245 þús­und strax og í 300 þús­und krónur á mán­uði frá og með maí 2018 sam­kvæmt drögum að kjara­samn­ingi milli Sam­taka atvinnu­lífs­ins og VR, LÍV, Flóa­banda­lags­ins og Stétt­Vest. VR birti í kvöld meg­in­línur í drög­unum að nýju kjara­samn­ing­un­um. Lægstu taxtar hjá VR munu hækka um 31,3 pró­sent á samn­ings­tím­an­um.

Samn­ings­drögin gera ráð fyrir að samið verði út árið 2018. Aðal­á­hersla er lögð á hækkun lægri launa og að verja milli­tekj­ur, að sögn VR. Stuðst verður við taxta­hækk­anir og launa­þró­un­ar­trygg­ingu í ár og á næsta ári en taxta- og pró­sentu­hækk­anir 2017 og 2018.

Launa­taxtar hækka um 25 þús­und krónur strax og byrj­un­ar­laun afgreiðslu­fólks um 3.400 krónuar að auki. Þá eiga laun ann­arra en þeirra sem fá borgað sam­kvæmt töxtum að hækka um 7,2 pró­sent fyrir laun að upp­hæð 300 þús­und krónum eða lægra, en pró­sentan fer svo stig­lækk­andi með hærri tekj­um. Þessi launa­þró­un­ar­trygg­ing verður þó aldrei lægri en þrjú pró­sent á þessu ári.

Á næsta ári er launa­þró­un­ar­trygg­ingin 5,5 pró­sent og fimmtán þús­und krónur að lág­marki. 1. maí 2017 eiga launa­taxtar svo að hækka um 4,5 pró­sent og byrj­un­ar­laun afgreiðslu­fólks að auki um 1.700 krón­ur. Almenn hækkun þá verður þrjú pró­sent.

Fyrsta maí 2018 hækka launa­taxtar svo um þrjú pró­sent og almenn hækkun verður tvö pró­sent miðað við átta mán­uði, það er það sem eftir lifir árs­ins 2018.

Nú er unnið að útfærslu ýmissa ann­arra ákvæða kjara­samn­ing­anna, að því er fram kemur í til­kynn­ingu VR. Mik­il­væg­ast þess­ara ákvæða er opn­un­ar­á­kvæði ef for­sendur kjara­samn­ings­ins stand­ast ekki. Stefnt er að því að ljúka samn­ingum fyrir viku­lok.