Dóms­nið­ur­stöðu hér­aðs­dóms Reykja­víkur í stóra mark­aðs­mis­notk­un­ar­mál­inu gegn fyrrum yfir­mönnum og starfs­mönnum Kaup­þings hefur verið áfrýjað til Hæsta­rétt­ar, sam­kvæmt frétt á vef­síðu Við­skipta­blaðs­ins. Sam­kvæmt heim­ildum blaðs­ins verður málið flutt í Hæsta­rétti í sömu mynd og fyrir hér­aðs­dómi hvað fjölda sak­born­inga varð­ar.

Þann 26. júní síð­ast­lið­inn voru Hreiðar Már Sig­urðs­son, Sig­urður Ein­ars­son, Ingólfur Helga­son, Einar Pálmi Sig­munds­son, Birnir Sær Björns­son, Pétur Krist­inn Guð­mars­son og Bjarki H. Diego allir dæmdir sekir í mál­in­u í hér­aðs­dómi Reykja­vík­ur. Tveimur liðum ákæru á hendur Magn­úsi Guð­munds­syni var vísað frá en að öðru leyti var hann sýkn­aður af þeim sökum sem á hann voru born­ar. Björk Þór­ar­ins­dóttir var einnig sýknuð í mál­inu.

Hreið­ari Má var ekki gerð frek­ari refs­ing, en hann afplánar nú þegar fimm og hálfs árs fang­els­is­dóm vegna Al Than­i-­máls­ins svo­kall­aða. Sig­urður Ein­ars­son fékk eins árs hegn­ing­ar­auka við þann fjög­urra ára dóm sem hann hlaut í Al Thani- mál­inu. Ingólfur Helga­son hlaut þyngsta dóminn, fjög­urra og hálfs árs fang­elsi að frá­dregnu gæslu­varð­haldi sem hann sætti á sínum tíma. Bjarki H. Diego hlaut tveggja og hálfs árs dóm, Einar Pálmi tveggja ára skil­orðs­bund­inn dóm og Birnir Sær og Pétur Krist­inn fengu báðir 18 mán­aða skil­orðs­bund­inn dóm.

Fram kemur í frétt Við­skipta­blaðs­ins að það var rík­is­sak­sókn­ari sem áfrýj­aði mál­inu hvað varðar alla sak­born­inga nema þáttum Hreið­ars Más, Sig­urðar Ein­ars­sonar og Bjarka H. Diego. Þeir voru fyrri til að áfrýja mál­inu.

Aðal­með­ferð máls­ins fyrir hér­aðs­dómi tók 130 klukku­stundir og stóð yfir í 22 daga. Málið er eitt stærsta mál sinnar teg­undar í Íslands­sög­unni.