Ný útgáfa af íslenska spurn­inga­leiknum QuizUp er komin út, en í henni er lögð aukin áhersla á sam­skipti og það að tengja not­endur leiks­ins sam­an.

Í nýja leiknum er frétta­veita svipuð því sem þekk­ist hjá ýmsum sam­fé­lags­miðlum þar sem hægt er að skoða upp­færslur ann­arra not­enda. Þá er búið að bæta leit­ar­mögu­leika í leikn­um. Önnur nýj­ung er að nú er hægt að spila spurn­inga­leik­inn í borð- og far­tölvum í gegnum vef­síð­una QuizUp.com.

Þor­steinn B. Frið­riks­son, stofn­andi og fram­kvæmda­stjóri Plain Vanilla, sem gefur leik­inn út, segir fyr­ir­tækið gríð­ar­lega spennt fyrir nýju útgáf­unni af QuizUp. „Við erum búin að leggja allt okkar hug­vit í þessa nýju útgáfu og þetta er því mjög stór dagur í sögu fyr­ir­tæk­is­ins,“ segir Þor­steinn í til­kynn­ingu frá fyr­ir­tæk­inu.

Svona lítur nýi leik­ur­inn út.

Hann segir nýju útgáf­una byggja á sömu hug­mynd og hafi heillað fólk við eldri útgáfu leiks­ins, sem kom út árið 2013, en nú sé sjónum beint að því að efla sam­fé­lags­hluta leiks­ins. „Þar erum við að hvetja not­endur til að kynn­ast öðrum not­endum sem deila sömu áhuga­málum og er eitt­hvað sem bætir alveg nýrri vídd við QuizUp upp­lifun­ina. Ég hvet Íslend­inga til að prófa þessa nýju útgáfu og gefa okkur sitt álit. Leik­ur­inn er að öllu leyti hann­aður á Íslandi, nánar til­tekið á Lauga­vegi 77, þar sem vinna nú um 85 manns.“