Ríkisendurskoðun telur að marka þurfi Náttúruminjasafni Íslands framtíðarstefnu sem bæði stjórnvöld og Alþingi styðji. Að öðrum kosti hljóti að koma til álita að endurskoða stöðu safnsins sem sérstakrar stofnunar. Þetta kemur fram í frétt á vefsíðu Ríkisendurskoðunar.
Í skýrslu Ríkisendurskoðunar um málefni Náttúruminjasafns Íslands árið 2012 kom meðal annars fram að sökum þess hve illa væri búið að safninu næði það ekki að uppfylla lögbundnar skyldur sínar sem höfuðsafn á sviði náttúrufræða. Þá lægi ekki fyrir stefna um starfsemi safnsins, fjárveitingar til þess væru af skornum skammti, safnkostur takmarkaður og húsnæðismál ótrygg. Að auki væri uppi ágreiningur milli safnsins og Náttúrufræðistofnunar Íslands um skiptingu safngripa sem síðarnefnda stofnunin varðveitt.
Ríkisendurskoðun hefur nú birt nýja svokallaða eftirfylgniskýrslu um málefni safnsins, þar sem kemur fram að staðan hafi lítið breyst á síðustu þremur árum. Þar segir: „Þrátt fyrir að starfsemi Náttúruminjasafns Íslands hafi glæðst er það enn rekið án formlegrar stefnu og af vanefnum. Þá eru húsnæðismál þess í mikilli óvissu, m.a. hefur það enga aðstöðu til sýningarhalds. Safnið nær því enn ekki að uppfylla lögbundnar skyldur sínar. Ríkisendurskoðun hvetur til þess að safninu verði sett skýr framtíðarstefna sem bæði mennta- og menningarmálaráðuneyti og Alþingi styðji í verki. Að öðrum kosti hljóti að koma til álita að leggja safnið niður sem sérstaka stofnun og koma starfseminni fyrir með öðrum hætti.“
Þá kemur jafnframt fram í skýrslunni að enn séu hnökrar á samstarfi Náttúruminjasafns Íslands og Náttúrufræðistofnunar Íslands. „Að mati Ríkisendurskoðunar er mikilvægt að lög kveði skýrar á um hlutverk og skyldur hvorrar stofnunar um sig en þau gera nú.“
