Sara Björk Gunn­ars­dótt­ir, lyk­il­leik­maður í lands­lið­i kvenna í knatt­spyrnu, spáir því að Ísland og Tékk­land geri 1-1 jafn­tefli í leiknum mik­il­væga í kvöld, í fjórðu umferð í und­ankeppni EM sem fer fram í Frakk­landi árið 2016. Staðan í riðl­inum er önnur en Ísland á að venj­ast. Ísland er á toppi rið­ils­ins, hefur unnið alla þrjá leiki sína til þessa og er með marka­töl­una 8-0. Sann­ar­lega ótrú­leg staða.

Kjarn­inn setti sig í sam­band við Söru Björk og spurði út í leik­inn mik­il­væga, meðal ann­ars hvaða leik­maður hún teldi að væri van­metn­asti leik­maður liðs­ins. „Ég myndi segja að Emmi Hall [Emil Hall­freðs­son] væri það en hann er að fá það hrós sem hann á skilið nún­a,“ sagði Sara Björk. Hún spáir því að Emil skori mark Íslands í leikn­um.

Tékkar hafa byrjað und­ankeppn­ina með svip­uðum hætti og Íslend­ing­ar, hafa unnið alla leiki sína og eru með marka­töl­una 7-3. Í þriðja sæti rið­ils­ins eru Hol­lend­ingar með þrjú stig, en þeir hafa tapað leikjum sínum gegn bæði Tékkum og Íslend­ing­um.

Leik­ur­inn hefst klukkan 19:45 og er í beinni útsend­ingu á RÚV.