Útlit er fyrir að hreinn gjaldeyrisforði Seðlabanka Íslands verði þrefalt stærri um næstu áramót en hann var í ársbyrjun, þrátt fyrir væntanlega sölu bankans á gjaldeyri í stóru aflandskrónuútboði í haust í tengslum við áætlun stjórnvalda um losun fjármagnshafta. Mikið gjaldeyrisinnflæði undanfarna ársfjórðunga, meðal annars vegna mikils vaxtar ferðaþjónustunnar og bata í viðskiptakjörum, hefur gert Seðlabankanum kleift að auka verulega kaup á gjaldeyri.
Greining Íslandsbanka fjallar um stækkandi gjaldeyrisforða Seðlabankans í dag og bendir meðal annars á að júní síðastliðinn hafi verið metmánuður í kaupum Seðlabankans á gjaldeyri. Bankinn keypti alls 187 milljónir evra á millibankamarkaði, sem samsvarar ríflega 29 milljörðum króna miðað við meðalgengi. Fyrra mánaðarmet var 115 milljónir evra í ágúst 2014. „Gjaldeyriskaupin í júní endurspegla að stórum hluta mikið innflæði gjaldeyris vegna þjónustuviðskipta, og er næsta víst að krónan hefði styrkst hressilega í síðasta mánuði ef ekki hefði verið fyrir inngrip bankans,“ segir í Mmorgunkorni greiningar Íslandsbanka.
„Það sem af er ári hefur Seðlabankinn keypt 551 milljón evra á millibankamarkaði, og greitt fyrir tæplega 82 milljarða króna. Það er ríflega tvöfalt hærri fjárhæð en á fyrri hluta ársins 2014. Hreinn gjaldeyrisforði Seðlabankans, þ.e. gjaldeyriseignir að frádregnum öllum skuldbindingum í gjaldeyri, hefur frá áramótum aukist úr 306 milljónum evra í 664 milljónir evra,“ segir ennfremur en aukningin samsvarar hækkun úr rúmlega 47 milljörum króna í um 95 milljarða króna. Ekki er útlit fyrir að Seðlabankinn dragi úr kaupum á gjaldeyri á næstunni, enda háannatími byrjaður í ferðaþjónustu og útlit fyrir þokkaleg vöruskipti, segir greiningin.
Fjallað er um væntanleg gjaldeyrisútboð í haust og er það mat greiningar Íslandsbanka og gjaldeyriskaup Seðlabankans á sumarmánuðum dugi til að útvega gjaldeyri fyrir útboðið.
„Fyrir liggur að SBÍ mun bjóða gjaldeyri úr gjaldeyrisforðanum til sölu í stóra útboðinu sem haldið verður fyrir aflandskrónueigendur í haust og kynnt var sem hluti áætlunar stjórnvalda um losun hafta í síðasta mánuði. Auk reiðufjár í evrum verður boðið upp á 20 ára ríkisbréf í íslenskum krónum og meðallangt ríkisbréf í evrum í útboðinu. Aflandskrónurnar nema nú u.þ.b. 291 milljörðum króna, en þar af 175 milljarðar króna í ríkistryggðum skuldabréfum og 116 milljarðar króna í innlánum.
Ef við gerum ráð fyrir að skipting milli evru reiðufjár annars vegar og skuldabréfa hins vegar verði svipuð og eignaskipting aflandskróna nú, og verðið á evru verði a.m.k. ekki lægra í útboðinu en í febrúarútboði Seðlabankans (EUR/ISK 200) gæti Seðlabankinn selt í kring um 500 milljónir evra úr gjaldeyrisforðanum í útboðinu. Við teljum þó að þessar forsendur séu í ríflegri kantinum, og salan úr forðanum verði væntanlega minni. Bæði gæti skiptigengið orðið hærra og eins gæti Seðlabankinn viljað beina aflandskrónueigendum í ríkari mæli í skuldabréfin.
Það virðist því líklegt að gjaldeyriskaup Seðlabankans á sumarmánuðum dugi ein og sér til þess að útvega gjaldeyri fyrir aflandskrónaútboðið. Að því gefnu að gjaldeyriskaup SBÍ á síðustu fjórum mánuðum ársins verði svipuð að jafnaði og síðasta vetur áætlum við að hreinn gjaldeyrisforði verði u.þ.b. 800-900 milljónir evra í lok árs. Jafngildir það allt að þreföldun frá stöðunni í ársbyrjun. Þess ber að geta að gjaldeyrisforði bankans í heild er mun stærri. Í lok maí síðastliðins nam hann t.a.m. tæplega 4 milljörðum evra (588 milljarðar króna), en stærstum hluta þeirrar fjárhæðar var aflað með skuldabréfaútgáfu ríkissjóðs í evrum og Bandaríkjadollar. Það er því mikilvægt að hreinn gjaldeyrisforði aukist nú jafn hratt og raun ber vitni, enda mun það auka líkurnar á farsælli losun hafta þegar fram í sækir,“ segir í Morgunkorni.
