Frá árinu 2007 hafa verið gerðar 176 breytingar á skattkerfinu. Þar af hafa skattar verið hækkaðir í 132 skipti og lækkaðir í 44 skipti. Fyrir hverja skattalækkun hafa skattar því verið hækkaðir þrisvar sinnum.
Viðskiptaráð Íslands birti í dag uppfært yfirlit yfir skattabreytingar undanfarinna ára. Í frétt á vefsíðu ráðsins er boðuðum aðgerðum um lækkun og einföldun tekjuskatta fagnað og afnám tolla á fatnað og skó sagt fagnaðarefni. „Það er von Viðskiptaráðs að stjórnvöld haldi áfram að lækka skatta á ný á komandi árum,“ segir á vefsíðu Viðskiptaráðs.
Veigamestu breytingarnar á skattkerfinu frá árinu 2007 eru eftirfarandi:
- Tekjuskattur einstaklinga hefur hækkað um 34%
- Útsvar hefur hækkað um 11%
- Fjármagnstekjuskattur hefur hækkað um 100%
- Erfðafjárskattur hefur hækkað um 100%
- Áfengisgjöld hafa hækkað um 60%
- Kolefnisgjöld á bensín og díselolíu hafa hækkað um 100%
- Tryggingagjald hefur hækkað um 37%
- Útvarpsgjald hefur hækkað um 75%
Að mati Viðskiptaráðs hefur þróunin í skattamálum verið jákvæð síðastliðin tvö ár. „Annars vegar hafa skattalækkanir í fyrsta sinn verið jafn margar eða fleiri en hækkanir og hins vegar fækkaði breytingum verulega árið 2015. Síðastliðin tvö ár hafa verið gerðar 23 skattalækkanir og 12 skattahækkanir. Árið 2014 var fyrsta skiptið sem skattalækkanir voru fleiri en skattahækkanir frá því að úttektin var fyrst framkvæmd,“ segir í frétt ráðsins.
Viðskiptaráð telur mikinn fjölda breytinga undanfarin ár skapa óhagfellt umhverfi fyrir verðmætasköpun á Íslandi. „Tíðar skattahækkanir draga úr fyrirsjáanleika við rekstur fyrirtækja og fjárhagslega áætlanagerð einstaklinga. Auk þess hafa fjölmargir nýir skattar verið innleiddir á undanförnum árum sem eykur flækjustig skattkerfisins og dregur þannig úr gagnsæi. Afleiðing þess er að einstaklingar eru ekki jafn meðvitaðir og áður um þann kostnað sem þeir bera vegna skattgreiðslna.“
Frétt Viðskiptaráðs Íslands um breytingar á skattkerfinu frá 2007.
