Skýrsla sem leggur mat á hags­muni Íslands af EES-­samn­ingnum verður kynnt á kom­andi hausti, að sögn Gunn­ars Braga Sveins­sonar utan­rík­is­ráð­herra. Þetta kemur fram í svari hans við fyr­ir­spurn Andr­ésar Inga Jóns­son­ar, vara­þing­manns Vinstri grænna. Fyr­ir­spurnin var lögð fyrir þingið áður en það fór í sum­ar­frí, en svarið var sett inn á vef Alþingis í dag.

Grunn­vinna við skýrsl­una hefur verið unnin í utan­rík­is­ráðu­neyt­inu en sam­ráð um efn­is­tök hefur verið haft við sam­ráðs­hóp aðila vinnu­mark­að­ar­ins, að því er Gunnar Bragi seg­ir. Þá hefur Hag­fræði­stofnun Háskóla Íslands verið falið að vinna úttekt á tollaí­viln­unum í við­skiptum við Evr­ópu­sam­bandið sam­kvæmt EES-­samn­ingn­um.

Skýrslan var boðið sem hluti af Evr­ópu­stefnu rík­is­stjórn­ar­inn­ar, og henni átti upp­haf­lega að skila haustið 2014. Hún átti að liggja fyrir síð­asta haust í til­efni af 20 ára afmæli EES-­samn­ings­ins.

Hluti af Evr­ópu­stefn­unni var einnig að rík­is­stjórnin setti sér mark­mið um að inn­leið­ing­ar­halli EES-­gerða yrði kom­inn undir eitt pró­sent vorið 2015 og að á sama tíma yrði ekk­ert dóms­mál fyrir EFTA-­dóm­stólnum vegna skorts á inn­leið­ingu EES-­gerða. Í nýjasta frammi­stöðu­mati Eft­ir­lits­stofn­unar EFTA, ESA, var inn­leið­ing­ar­hall­inn enn 2,8% í októ­ber í fyrra en nið­ur­stöður frammi­stöðu­mats sem miðar við stöð­una í lok apríl á þessu ári hafa ekki verið birt­ar, að sögn utan­rík­is­ráð­herra. Gert er ráð fyrir að inn­leið­ing­ar­hall­inn verði um tvö pró­sent. Fimm mál eru nú fyrir EFTA-­dóm­stólnum vegna skorts á inn­leið­ingu.