Eftir stór­kost­legan árangur karla- og kvenna­lands­liða Íslands í fót­bolta á und­an­förnum árum er umræða um bygg­ingu nýs þjóð­ar­leik­vangs orðin lif­andi á nýjan leik. Eftir að Ísland tryggði sér sæti í úrslita­keppni EM karla, á næsta ári í Frakk­landi, þá er greini­legt að for­svars­menn KSÍ vilja ólmir að nýr völlur rísi. Eða í það minnsta að for­sendur fyrir bygg­ingu nýs vallar verði skoð­aðar vel. KSÍ hefur nú þegar fengið Pétur Mart­eins­son hjá ráð­gjafa­fyr­ir­tæk­inu Borg­ar­brag, sem gerði garð­inn frægan sem mið­vörður í íslenska lands­lið­inu, til þess að kanna for­sendur fyrir bygg­ingu nýs vall­ar.

Þrátt fyrir að íþrótta­að­staða hafi batnað mikið í Laug­ar­dal á und­an­förnum árum, ekki síst inn­an­hús­að­staða fyrir frjálsar íþróttir við gömlu Laug­ar­dals­höll­ina, þá virð­ist blasa við, að búa megi til skemmti­legri heima­völl fyrir fót­bolta en nú er. Fjölga má sæt­um, og setja má sætin nær vell­in­um, ekki síst svo að aðstaða fyrir áhorf­endur sé skemmti­legri og útsýni betra. Auk þess ætti vel að vera hægt, að tengja völl­inn betur en nú er við stór­kost­legt útvistar og mann­lífs­svæði í Laug­ar­daln­um, og vax­andi byggð í hverf­inu á næstu árum, sé horft til skipu­lags Reykja­vík­ur­borg­ar.

En á end­anum mun þetta alltaf snú­ast um pen­inga, og úr hvaða vasa þeir koma. Spenn­andi verður að sjá hvaða mögu­leikar verða teikn­aðir upp hvað fjár­mögn­un­ina varð­ar, því vænt­an­lega mun kostn­að­ur­inn alltaf hlaupa á millj­örð­um.