Tekjujöfnuður ríkisins á síðasta ári var jákvæður um 46,4 milljarða króna. Það er betri afkoma en gert var ráð fyrir. Tekjurnar voru hærri en talið var í fjárlögum fyrir árið 2014 og munaði mestu um óreglulegar tekjur eins og háar arðgreiðslur, meðal annars frá Landsbanka Íslands, en einnig höfðu aukin umsvif í efnahagslífinu áhrif.
Þetta kemur fram í tilkynningu frá Lánamálum ríkisins. Ríkisútgjöld síðasta árs voru umfram heimildir fjárlaga en voru samþykkt með fjáraukalögum, þar sem meðal annars var gert ráð fyrir að hluta af auknum tekjum yrði ráðstafað í flýtingu á niðurfærslu verðtryggðra lána.
Á árinu 2014 var ríkissjóður með hreinan lánsfjárafgang sem nam um 4 prósent af landsframleiðslu, samanborið við 1,6 prósent lánsfjárþörf árið áður. Er þessi niðurstaða hagstæðari en gert var ráð fyrir, að því er segir í tilkynningunni. Haft er eftir Bjarna Benediktssyni, fjármála- og efnahagsráðherra, að efnahagsleg staða hafi verið að styrkjast. „Efnahagsleg staða Íslands sem hefur verið að styrkjast að undanförnu einkennist af stöðugleika með lágri verðbólgu, litlu atvinnuleysi, auknum kaupmætti og hallalausum ríkisrekstri. Töluverður hagvöxtur hefur verið undanfarin ár og nam hann 1,9% árið 2014. Mikil umsvif voru í hagkerfinu en þrátt fyrir það hefur viðskiptajöfnuður við útlönd verið jákvæður. Öflugur hagvöxtur og aukin eftirspurn í efnahagslífinu hafa haft jákvæð áhrif á afkomu ríkissjóðs,“ segir Bjarni um niðurstöður ríkisreiknings. Hann segir mikla áherslu hafa verið lagða á að koma ríkisrekstrinum í jafnvægi og skila afgangi í stað halla undanfarinna ára. „Ríkisstjórnin hefur lagt á það höfuðáherslu að ná tökum á ríkisrekstrinum ásamt því að minnka álögur á einstaklinga og atvinnulífið og stuðla að aukinni fjárfestingu í hagkerfinu. Miklu máli skiptir að styrkja stöðu ríkissjóðs enn frekar á næstu árum og að vinna að frekari lækkun ríkisskulda sem hlutfalls af landsframleiðslu.“
