Sam­komu­lag liggur fyrir milli þing­flokka um að ljúka þing­störfum næst­kom­andi föstu­dag. Sam­kvæmt upp­haf­legri starfs­á­ætlun átti Alþingi að ljúka störfum 29. maí, en gerir það ekki fyrr en 3. júlí, eða 36 dögum síð­ar. Á meðal þeirra mála sem stjórn­ar­flokk­arnir gáfu eftir til að gera þing­lok mögu­leg voru afgreiðsla mak­ríl­frum­varps­ins og færsla fjöl­margra virkj­ana­kosta úr bið­flokki í nýt­ing­ar­flokk ramma­á­ætl­un­ar. Stærsta málið sem verður klárað á síð­ustu dögum þings­ins er afgreiðsla þeirra frum­varpa sem snúa að áætlun stjórn­valda um losun hafta, meðal ann­ars frum­varp um stöð­ug­leika­skatt.

Mak­ríl­frum­varp­inu verður frestað fram á haust­þing og ein breyt­ing gerð á ramma­á­ætlun með því að færa Hvamms­virkjun úr bið­flokki í nýt­ing­ar­flokk.

Þór­unn Egils­dótt­ir, þing­flokks­for­maður Fram­sókn­ar­flokks­ins, sagði í fréttum Stöðvar 2 í gær­kvöldi mestu von­brigðin varð­andi þing­loks­sam­komu­lagið vera það að mak­ríl­frum­varpið fari ekki í gegn. Þar hafi meiri­hlut­inn mætti minni­hlut­anum í öllum hans kröfum en án árang­urs. Helgi Hjörvar, þing­flokks­for­maður Sam­fylk­ing­ar, sagði á sama vett­vangi að það hefði aldrei verið raun­sætt að afgreiða fleiri mál en þau sem nú hefur samist um að hleypa í gegn. Í ljósi þess hefði verið hægt að kom­ast að þess­ari nið­ur­stöðu strax í máli en sam­komu­lagið hefði hins vegar tekið ákveð­inn tíma.