Einka­hluta­fé­lagið X-2121 var úrskurðað gjald­þrota 10. des­em­ber síð­ast­lið­inn, en félagið hét áður Útvarp Saga ehf. Nafni þess var breytt 22. sept­em­ber síð­ast­lið­inn og Arn­þrúður Karls­dótt­ir, eig­andi félags­ins, ritar undir nafna­breyt­ing­una.

Rekstur Útvarps Sögu heyrir nú undir einka­hluta­fé­lagið Saga­Net ehf., sem sömu­leiðis er í 100 pró­senta eigu Arn­þrúðar Karls­dótt­ur. Félagið var stofnað í febr­ú­ar­mán­uði síð­ast­liðn­um.

Útvarps­stöðin var dæmd í Hér­aðs­dómi Reykja­víkur í maí­mán­uði árið 2013 til að greiða Sig­urði G. Tómassyni útvarps­manni, sem jafn­framt kom að stofnun stöðv­ar­inn­ar, 745 þús­und krónur í van­goldin laun auk máls­kostn­að­ar. Útvarp Saga áfrýj­aði nið­ur­stöðu hér­aðs­dóms til Hæsta­réttar Íslands, sem stað­festi nið­ur­stöð­una í des­em­ber 2013.

Í grein í Séð & heyrt, sem birt­ist á síð­asta ári, er haft eftir Arn­þrúði að hún hygg­is­t ekki una nið­ur­stöðu Hæsta­réttar og útvarps­stöðin stefni í gjald­þrot vegna þess. Þá segir í grein­inni: „Arn­þrúður ætlar þó ekki að leggja árar í bát strax þótt krafan um gjald­þrot verði tekin fyrir í byrjun sept­em­ber. Hún seg­ist vona að Útvarp Saga fái lifað og minnir hlust­endur og vel­unn­ara stöðv­ar­innar á að hægt er að leggja henni lið á söfn­un­ar­reikn­ingnum 0301-26-111100 á kenni­töl­unni 640214-0310.“

Athygli vekur að kennitalan sem er skráð fyrir söfn­un­ar­reikn­ingn­um, er kennitala Saga­Net ehf., en ekki Útvarps Sögu.

Í sam­tali við Kjarn­ann sagði Arn­þrúður Karls­dóttir að rekstur Útvarps Sögu hefði verið seldur öðru félagi í febr­ú­ar. Hún vildi að öðru leyti engar upp­lýs­ingar veita blaða­manni.

Kjarn­inn náði ekki tali af skipta­stjóra X-2121 ehf. (Út­varp Saga) við vinnslu frétt­ar­inn­ar.