Viðskiptaráð Íslands vísar gagnrýni BSRB á bug, þegar kemur að úttekt á þróun opinberra starf. Eins og greint var frá hér á vefsíðu Kjarnans í morgun þá gagnrýnir BSRB Viðskiptaráð harðlega í tilkynningu fyrir að bera á torg rangar tölur um þróun mál þegar kemur að opinberum störfum. BSRB segir opinberum störfum hafa fækkað um tæplega 11 prósent frá árinu 2008, og að opinberum starfsmönnum hafi fjölgað um 5,6 prósent á meðan fjöldi starfsmanna á almennum vinnumarkaði hafi aukist um 11,8 prósent.
Viðskiptaráð hafnar þessum atriðum sem fram koma í tilkynningu BSRB og segir að Viðskiptaráð hafa stuðst við réttar tölur í sínu mati. Í tilkynningu frá Viðskiptaráði segir meðal annars orðrétt: „Stærsta misræmið í tölum Viðskiptaráðs og BSRB má finna í fjölda ríkisstarfsmanna um síðustu aldamót. Í tölum BSRB er fullyrt að stöðugildi hjá ríkinu hafi verið 15.700 árið 2000 og vísað er til upplýsinga frá fjármálaráðuneytinu án þess að beinnar heimildar sé getið. Þessi fullyrðing stangast á við opinberar upplýsingar frá sama ráðuneyti. Í svari fjármálaráðherra við fyrirspurn á Alþingi þann 19. nóvember 2009 kemur fram að fjöldi stöðugilda hjá ríkinu hafi verið 14.000 árið 2000. Viðskiptaráð notaðist við hinar opinberu tölur, en ekki kemur fram í tilkynningu BSRB hvers vegna litið var framhjá þeim. Þá kemur fram í tilkynningu BSRB að störfum hjá ríkinu hafi fækkað um 10,6% frá árinu 2008 og því haldið fram að fullyrðingar Viðskiptaráðs um einungis 3% fækkun ríkisstarfsmanna á þessum tíma séu rangar. Hér yfirsést BSRB tvennt. Í fyrsta lagi var stór málaflokkur, málefni fatlaðra, fluttur frá ríkinu yfir til sveitarfélaga árið 2011 og færðust þá 905 stöðugildi á milli þessara aðila. Ef bera á saman tölur fyrir og eftir þessa tilfærslu ber að leiðrétta fyrir henni. Sé það gert hverfur um helmingur þeirrar fækkunar stöðugilda sem BSRB fullyrðir að átt sér hafi stað hjá ríkinu á þessu tímabili.
Í öðru lagi þá miðaði Viðskiptaráð í útreikningum sínum við árið 2009, þegar efnahagsáætlun Alþjóðagjaldeyrissjóðsins og síðustu ríkisstjórnar hófst, en ekki árið 2008 líkt og BSRB virðist hafa talið. Að teknu tilliti til tilfærslu málefna fatlaðra hefur ríkisstarfsmönnum fækkað um 3% frá árinu 2009, líkt og áður kom fram hjá Viðskiptaráði, en ríkisstarfsmönnum fækkað um tæp 5% frá árinu 2008 en ekki 10,6% eins og kom fram í tilkynningu BSRB.“
Í tilkynningunni frá Viðskiptaráði er enn fremur hamrað á því að fjölgun starfa hjá hinu opinbera hafi verið verulega umfram fjölgun starfa á almennum vinnumarkaði, þvert á það sem fram kemur í tilkynningunni frá BSRB. „Ef litið er til fjölda opinberra starfsmanna í heild, bæði hjá ríki og sveitarfélögum, má sjá að þeim hefur fjölgað um 29% frá aldamótum (úr 28.700 stöðugildum árið 2000 í 36.880 árið 2014 samkvæmt fjármálaráðuneytinu og Sambandi íslenskra sveitarfélaga).“
Tilkynninguna frá Viðskiptaráði má lesa í heild sinni hér.
