Laura Weintraub, sem starfar sem lög­reglu­þjónn í sjálf­boða­starfi hjá lög­reglu­yf­ir­völdum í Santa Paula í Banda­ríkj­un­um, hefur verið send í ótíma­bundið leyfi frá störfum vegna mynd­bands sem hún setti inn á Youtu­be.

Í mynd­band­inu lýsir Weintraub djúp­stæðu hatri sínu í garð hjól­reiða­manna. Í stiklunni segir hún: „Ég hata hjól­reiða­menn, hvern ein­asta þeirra.“ Þetta segir Weintraub þar sem hún er far­þegi í bíl og tekur myndir af hjól­reiða­mönnum í veg­kant­in­um. Weintraub gengur meira að segja svo langt að spyrja öku­mann bíls­ins hvað hún þurfi að borga honum mikið svo hann aki yfir hjól­reiða­mann. ­Öku­­mað­ur­inn svarar þá um hæl: „Hversu mik­inn pen­ing ertu með í vesk­inu þín­u?“

Mynd­bandið vakti hörð við­brögð meðal almenn­ings, og ekki síst hjól­reiða­manna sem hafa for­dæmt lög­reglu­þjón­inn fyrir ummæli sín.

Face­book-­síða lög­reglu­yf­ir­valda í Santa Paula log­aði eftir að Weintraub setti mynd­bandið á vef­inn, og brott­vikn­ingar Weintraub var kraf­ist.