Alþjóðagjaldeyrissjóðurinn birti í gær yfirlýsingu um stöðu mála á Íslandi, og skólaði ráðamenn til gagnvart því sem þeir eiga að leita að í æskilegum eiganda að banka. Þá fékk Fjármálaeftirlitið sinn skerf af vantrausti líka. Grátkórinn víðfrægi er mættur enn og aftur. Nú kvarta útvegsmenn og talsfólk þeirra yfir háu gengi og kalla eftir viðbrögðum stjórnvalda og jafnvel lækkun veiðigjalda, annars flytji þeir landvinnslu til útlanda.
Ítarlega er farið yfir hugmyndir um að banna Airbnb og sambærilega starfsemi á völdum stöðum á Íslandi, líkt og gert hefur verið í mörgum af stærstu borgum heims. Og sérfræðingur Kjarnans í Bandaríkjunum fer yfir ótrúlega atburðarás í kringum fyrrverandi öryggisráðgjafann Michael Flynn, sem gæti mögulega verið kærður fyrir landráð. Augljóst er að Harvey Keitel mun fara með hlutverk Flynn ef gerð verður kvikmynd um þetta mál.
Umsjónarmenn Kvikunnar þessa vikuna eru Þórður Snær Júlíusson og Magnús Halldórsson.
